Իրանն ու ԱՄՆ-ը պայմանավորվել են շարունակել բանակցությունները՝ լուծելու իրանական միջուկային ծրագրի շուրջ ստեղծված ճգնաժամը և քննարկում են խորհրդակցությունների հաջորդ փուլի ժամանակն ու վայրը։ Այս մասին հայտնել է Իսլամական Հանրապետության արտաքին գործերի նախարարության պաշտոնական ներկայացուցիչ Էսմայիլ Բաղային։
«Այն փաստը, որ բանակցություններ են ընթանում, և երկու կողմերն էլ հաստատում են դրանք շարունակելու իրենց մտադրությունը, վկայում է այն մասին, որ բանակցային գործընթացը շարունակվելու է։
Օմանի արտաքին գործերի նախարարությունը, որը հանդես է գալիս որպես այս երկխոսության միջնորդ և համակարգող, համագործակցելով մեր և ամերիկյան կողմի հետ, կհայտարարի հաջորդ փուլի օրը և վայրը։ Ներկայում խորհրդակցություններ են ընթանում՝ պարզելու համար, թե որ պահն են երկու կողմերն առավել հարմար համարում»,- ասել է Բաղային IRNA-ին:
«Իրանն ունի չափազանց զգույշ և անվստահություն ցուցաբերելու բոլոր իրավունքը՝ հաշվի առնելով Միացյալ Նահանգների կողմից նախկինում ստանձնած պարտավորությունների կրկնակի խախտումները և հակասությունները, որոնք մենք տեսնում ենք նրա խոսքերում և գործողություններում:
Քանի որ մենք հաստատապես համոզված ենք, որ մենք իրավացի ենք և գիտենք, որ մեր պահանջները հիմնված են միջազգային իրավունքի վրա, արտացոլում են Իրանի ժողովրդի կամքը և բխում են միջուկային գործին ռացիոնալ մոտեցումից, մենք վճռականորեն կշարունակենք այդ ճանապարհը՝ մեր քայլերը փոխկապակցելով մյուս կողմի գործողությունների հետ և հիմնված մեր սկզբունքների վրա»,- հավելել է դիվանագետը։
