Պատերազմից հետո Պաղեստինին կպահանջվի 15 տարի նորմալ կյանքի վերադառնալու համար։ Այս մասին Բաղդադում հայտարարել է Պաղեստինի ազգային էկոնոմիկայի նախարար Մուհամեդ ալ-Ամուրը։ Նա ելույթ է ունեցել Արաբական լիգայի տնտեսական և սոցիալական հարցերի խորհրդի նիստում, որը տեղի է ունենում համաարաբական կազմակերպության 34-րդ գագաթնաժողովին ընդառաջ, հաղորդում է Իրաքի լրատվական գործակալությունը։
«Իսրայելի հետ պատերազմի ավարտից հետո մեզանից 15 տարի կպահանջվի նորմալ կյանքի վերադառնալու համար», - ընդգծել է ալ-Ամուրը։ «Չնայած ներկա իրավիճակին, պաղեստինցիները ցուցաբերում են տոկունություն, մեր ժողովուրդը չի պարտվի, որքան էլ տեւի օկուպացիան»:
«Գազան ենթարկվում է ցեղասպանության: Հազարավոր բեռնատարներ մարդասիրական օգնություններով Իսրայելի կողմից թույլ չեն տալիս մտնել Գազայի հատված: Մինչդեռ աշխարհը լուռ հետևում է Գազայի կոտորածին», - շարունակել է նա:
«Հորդանան գետի արեւմտյան ափին ավելի քան 1000 իսրայելական անցակետ կա, որը քայքայում է տնտեսությունը»,- ասել է նախարարը։
Նրա խոսքով՝ «Հորդանան գետի արեւմտյան ափին եւ Գազայի հատվածում գործազրկության մակարդակը հասնում է 51 տոկոսի»։
