Բրազիլիայի և Չինաստանի առաջարկները՝ Ուկրաինայում հակամարտությունը լուծելու համար, հիմք կդնեն կողմերի միջև համապարփակ երկխոսության և Եվրոպայում խաղաղության վերականգնման համար։ Այս մասին հայտարարել է հարավամերիկյան հանրապետության ղեկավար Լուիս Ինասիո Լուլա դա Սիլվան՝ Պեկինում Չինաստանի նախագահ Սի Ծինփինի հետ բանակցություններից հետո մամուլի համար համատեղ հայտարարության ժամանակ։
«Բրազիլիայի և Չինաստանի միջև ընդհանուր համաձայնությունները, որոնք ուղղված են ուկրաինական ճգնաժամի քաղաքական կարգավորմանը, հիմք են ստեղծում համապարփակ երկխոսության համար, որը խաղաղությունը կվերադարձնի Եվրոպա»,- ասել է Բրազիլիայի ղեկավարը։
Լուլա դա Սիլվան ևս մեկ անգամ կոչ է արել բարեփոխել ՄԱԿ-ը՝ ընդգծելով, որ ՄԱԿ-ի Անվտանգության խորհրդի ներկայիս ձևաչափը թույլ չի տալիս նրան հաղթահարել մոլորակի հիմնական մարտահրավերները։
«Անվտանգության խորհուրդը պետք է արտացոլի այն բազմազանությունը, որն ի հայտ է եկել ժամանակակից իրողություններում»,- ընդգծել է նա։
