Քրդստանի աշխատավորական կուսակցության (PKK) և թուրքական պետության միջև զինված հակամարտության դադարեցումը կնպաստի ողջ տարածաշրջանի կայունությանը։ Այս մասին Անկարայում կայացած մամուլի ասուլիսում հայտարարել է Սիրիայի անցումային կառավարության արտաքին գործերի նախարարության ղեկավար Ասադ ալ-Շեյբանին՝ Թուրքիայի և Հորդանանի ԱԳ նախարարներ Հաքան Ֆիդանի և Այման աս-Սաֆադիի հետ եռակողմ հանդիպման արդյունքներով։
«Ցանկանում եմ շնորհավորել Թուրքիային PKK-ի հետ այսօր հայտարարված զինադադարի կապակցությամբ, դա կնպաստի ողջ տարածաշրջանի կայունությանը»,- ասել է Սիրիայի արտգործնախարարը։
Ավելի վաղ PKK-ն համագումար էր անցկացրել և որոշել էր ցրվել և դադարեցնել զինված պայքարը Թուրքիայի հետ 47 տարվա առճակատումից հետո։ Համագումարի հաղորդագրության մեջ ասվում էր, որ Թուրքիայում ահաբեկչական ճանաչված կուսակցությունն այժմ շարժվում է դեպի պայքարի ժողովրդավարական և քաղաքական մեթոդներ։
Փետրվարի վերջին PKK-ի առաջնորդ Աբդուլլահ Օջալանը, ով ցմահ բանտարկություն է կրում Թուրքիայում, կոչ արեց կուսակցության հետ կապված բոլոր կազմավորումներին վայր դնել զենքերը, դադարեցնել հակամարտությունը Անկարայի հետ և լուծարել հենց PKK-ն։
