Թայվանը կմիանա Ուկրաինայում Լիտվայի և Իսլանդիայի գլխավորած ականազերծման միջազգային կոալիցիայի ֆինանսավորմանը և կներդնի 1,8 միլիոն եվրո։ Այս մասին հայտնել է Բալթյան հանրապետության պաշտպանության նախարարությունը։
«Լիտվան գնահատում է Թայվանի պատրաստակամությունը՝ ի դեմս Վիլնյուսում իր առաքելության, ֆինանսական աջակցություն ցուցաբերելու այս կարևոր մարդասիրական նախաձեռնությանը:
Չպայթած զինամթերքի չեզոքացումը ամենահրատապ մարտահրավերներից մեկն է Ուկրաինայի քաղաքացիական կյանքի անվտանգության և տնտեսական վերականգնման համար», - ասվում է հայտարարության մեջ:
Այս տեղեկությունը հայտնվել է Թայվանի վարչակազմի նախկին ղեկավար Ցայ Ինգ Վենի Վիլնյուսում գտնվելու ֆոնին։
Միջազգային կոալիցիա ստեղծելու գաղափարը 2023 թվականի հուլիսին Ռամշտեյնի ձևաչափով Ուկրաինայի անվտանգության և աջակցության վերաբերյալ հանդիպման արդյունքն էր: Կոալիցիան չի նախատեսում մասնակցել առաջնագծում կամ մարտական գոտիներում ականազերծմանը:
