Երուսաղեմ – Իսրայելի վարչապետ Բենյամին Նեթանյահուի անվտանգության կաբինետը քվեարկել է Գազայում ռազմական գործողությունները ընդլայնելու օգտին՝ նպատակ ունենալով ամբողջովին գրավել տարածքն ու պահել այն Իսրայելի վերահսկողության տակ։ Իսրայելի հանրային հեռարձակող Kan-ի հաղորդմամբ՝ գործողությունների նոր ծրագիրը լինելու է փուլային և կարող է տևել մի քանի ամիս։ Նախատեսվում է շարժվել գոտու տարբեր հատվածներով՝ միաժամանակ պահելով գրաված տարածքները, ի տարբերություն նախկին մարտավարության, երբ ներխուժումները տեղի էին ունենում կարճաժամկետ։Սակայն պաշտոնյան նշել է, որ դեռ բաց է մնում զինադադարի և պատանդների ազատ արձակման շուրջ բանակցությունների հնարավորությունը, մինչ ԱՄՆ նախագահ Դոնալդ Թրամփի հաջորդ շաբաթվա այցը տարածաշրջան։
Այս պահին Իսրայելը վերահսկում է Գազայի մոտ մեկ երրորդը։ Գործողությունները վերսկսվել են մարտին՝ ԱՄՆ-ի աջակցությամբ ձեռք բերված զինադադարի փլուզումից հետո։ Գազան ամբողջությամբ շրջափակված է, և մարդասիրական օգնության մուտքը արգելափակված է։Ըստ ծրագրի՝ քաղաքացիական բնակչությունը կտեղափոխվի ավելի հարավ, սակայն բլոկադան առայժմ չի վերացվելու։ ՄԱԿ-ը և մարդասիրական կազմակերպությունները խստորեն քննադատել են Իսրայելի նոր ծրագիրը՝ այն անվանելով «մարդասիրական օգնության մատակարարման միլիտարիզացիա»:
Իսրայելի Զինված ուժերի պետը հայտարարել է, որ արդեն տասնյակ հազարավոր պահեստազորայինների կանչեր են ուղարկվել՝ առաջիկա լայնածավալ գործողություններին մասնակցելու համար։
Հիշեցնենք, որ պատերազմը սկսվել է 2023 թ. հոկտեմբերի 7-ին՝ ՀԱՄԱՍ-ի հարձակմամբ, որի հետևանքով զոհվել է մոտ 1,200 իսրայելցի։ Ի պատասխան՝ Իսրայելը սկսել է լայնածավալ ցամաքային և օդային հարձակումներ, որոնք ըստ Գազայի առողջապահական իշխանությունների՝ ավելի քան 52,000 պաղեստինցու մահվան պատճառ են դարձել, փոխանցում է Reuters-ը։
