Ուկրաինայի կառավարությունը Գերագույն ռադա է ներկայացրել ԱՄՆ-ի հետ բնական ռեսուրսների մասին համաձայնագրի վավերացման մասին օրինագիծը։ Փաստաթղթի ստացումը հաստատվել է խորհրդարանի կայքում։
Բացի վավերացման մասին օրինագծից, Ռադային է ներկայացվել նաև համաձայնագրի տեքստը։
«Կառավարությունը հույսը դնում է խորհրդարանականների աջակցության վրա՝ այս համաձայնագրի արագ վավերացման համար»,- այս կապակցությամբ գրել է վարչապետ Դենիս Շմիհալը Telegram-ի իր ալիքում։
Ավելի վաղ խորհրդարանի անդամ Յարոսլավ Ժելեզնյակը հայտնել էր, որ վավերացման քվեարկությունը նախատեսվում է անցկացնել մայիսի 8-ին։
ԱՄՆ-ի հետ ընդերքի ռեսուրսների մասին համաձայնագրի ստորագրման մասին հայտնի դարձավ մայիսի 1-ի գիշերը: Ինչպես հայտնել է Ուկրաինայի առաջին փոխվարչապետ և էկոնոմիկայի նախարար Յուլիա Սվիրիդենկոն, համաձայնագրի համաձայն՝ Կիևը նոր վարձակալությունից և նոր տարածքներում օգտակար հանածոների արդյունահանման նոր լիցենզիաներից ստացված եկամտի 50%-ը կներդնի ստեղծվող երկկողմ ներդրումային հիմնադրամին:
