ԱՄՆ-ի և Իրանի միջև անուղղակի բանակցությունների չորրորդ փուլի վայրը կհայտարարեն Օմանի իշխանությունները, որոնք միջնորդի դեր են կատարում Իսլամական Հանրապետության միջուկային ծրագրի շուրջ տարաձայնությունների կարգավորման գործընթացում։ Այս մասին հայտարարել է Իրանի արտաքին գործերի նախարար Աբբաս Արաղչին։
«Հաջորդ փուլը, ամենայն հավանականությամբ, կկայանա շաբաթ օրը։ Օմանի կառավարությունը զբաղվում է բոլոր հարցերով։ Նրանք երկու կողմերին կփոխանցեն ողջ տեղեկատվությունը, այդ թվում՝ բանակցությունների վայրի մասին», – Իրանի պետական հեռուստատեսությամբ հայտարարել է արտգործնախարարը։
ԱՄՆ-ի և Իրանի միջև երկխոսության երրորդ փուլն տեղի է ունեցել ապրիլի 26-ին Մասկատում։ Բարձր մակարդակի քաղաքական բանակցություններին զուգահեռ, Օմանի մայրաքաղաքում անցկացվել են տեխնիկական խորհրդակցություններ, որոնց շրջանակներում փորձագետները քննարկել են հանրապետության միջուկային ծրագրի վերաբերյալ հնարավոր համաձայնագրի մանրամասները։
Բանակցությունների առաջին փուլը տեղի է ունեցել ապրիլի 12-ին Օմանում, երկրորդը՝ ապրիլի 19-ին Հռոմում: Իրանի պատվիրակությունը ներկայացնում էր երկրի արտաքին գործերի նախարար Աբբաս Արաղչին, իսկ ամերիկյան կողմը՝ ԱՄՆ նախագահի հատուկ բանագնաց Սթիվ Ուիտկոֆը։
