ԱՄՆ նախագահ Դոնալդ Թրամփը հույս է հայտնել, որ ուկրաինական հակամարտությունը կարգավորելու գործարքը ձեռք կբերվի առաջիկա օրերի ընթացքում։ Նա համապատասխան հայտարարություն է հրապարակել Truth Social սոցիալական ցանցում։
«Հուսով եմ՝ Ռուսաստանն ու Ուկրաինան գործարք կկնքեն այս շաբաթ»,- գրել է ամերիկացի առաջնորդը։ Այդ դեպքում, նրա պնդմամբ, երկու կողմերն էլ «կսկսեն ակտիվորեն բիզնես անել» ԱՄՆ-ի հետ, ինչը թույլ կտա «հարստանալ»։
Ապրիլի 19-ին ՌԴ նախագահ Վլադիմիր Պուտինը ՌԴ ԶՈւ Գլխավոր շտաբի պետ Վալերի Գերասիմովի հետ հանդիպման ժամանակ հայտարարել է բոլոր ռազմական գործողությունները մինչև ապրիլի 21-ի ժամը 00:00-ն դադարեցնելու մասին և կոչ արել Կիևին անել նույնը։
Նա ընդգծել է, որ Ռուսաստանը միշտ պատրաստ է եղել բանակցությունների եւ ողջունում է ԱՄՆ-ի, Չինաստանի եւ այլ երկրների ցանկությունը՝ ուկրաինական հակամարտության արդարացի կարգավորման համար։
