Իրանը մտադիր չէ համագործակցել Սիրիայի անցումային կառավարության հետ, քանի դեռ Սիրիայի նոր իշխանությունները չեն ապահովել երկրում անվտանգությունը։ Այս մասին հայտարարել է Իսլամական Հանրապետության արտաքին գործերի նախարարության ղեկավար Աբբաս Արաղչին։
«Իրանը չի փոխգործակցում Սիրիայի ներկայիս կառավարության հետ: Մենք կապեր չունենք, և չենք շտապում դրանք հաստատել:
Մենք պարզապես սպասում ենք, որ նրանք ավարտեն անվտանգության, կայունության ապահովման աշխատանքը և ստեղծվի ներառական, օրինական կառավարություն, որը կներառի բոլոր էթնիկ խմբերը»,- ասել է նա RT-ին տված հարցազրույցում։
Իրանցի նախարարի խոսքով՝ սիրիական հարցը բարձրացվել է իր ռուս գործընկեր Սերգեյ Լավրովի հետ հանդիպման ժամանակ։
Թե՛ Իրանը, թե՛Ռուսաստանը չափազանց անհանգստացած են Սիրիայում տիրող իրավիճակով, և երկու կողմերն էլ շահագրգռված են տարածաշրջանում կայունության և անվտանգության ապահովմամբ, հավելել է Արաղչին։
Մարտի 6-10-ը Սիրիայի նոր կառավարության ներքո անվտանգության ուժերը ճնշել են նախկին նախագահ Բաշար Ասադի կողմնակիցների զինված ապստամբությունները Լաթաքիա, Տարտուս, Համա և Հոմս նահանգներում։ Բախումների արդյունքում զոհվել է ավելի քան 1500 մարդ։
