Իրանի արտաքին գործերի նախարար Աբբաս Արաղչին պաշտոնական այցով ժամանել է Մոսկվա, որտեղ բանակցություններ կվարի ռուս պաշտոնյաների հետ, ինչպես նաև Իրանի գերագույն առաջնորդի գրավոր ուղերձը կփոխանցի նախագահ Վլադիմիր Պուտինին, ասվում է Իրանի նախարարի Telegram ալիքում հրապարակված հաղորդագրության մեջ։
«Մոսկվա է ժամանել ԱԳ նախարար Աբբաս Արաղչին»,- ասվում է հաղորդագրության մեջ։
Ավելի վաղ ՌԴ-ում Իրանի դեսպան Քազեմ Ջալալին ասել էր, որ այցի ընթացքում նախատեսված թեմաներից են լինելու երկկողմ հարաբերությունների խթանումը, տարածաշրջանային համագործակցությունը և փոխգործակցությունը միջազգային ասպարեզում։ Իրանի արտգործնախարարությունը նաև նշել է, որ Արաղչին ռուսական կողմի հետ կքննարկի Թեհրանի միջուկային ծրագրի շուրջ իրանա-ամերիկյան բանակցությունների շուրջ ստեղծված իրավիճակը։
Ապրիլի 12-ին Օմանի մայրաքաղաքում տեղի են ունեցել անուղղակի բանակցություններ Մերձավոր Արևելքի հարցերով ԱՄՆ նախագահի բանագնաց Սթիվ Ուիթքոֆի և Իրանի արտգործնախարար Աբբաս Արաղչիի միջև։
