«Փաստ» օրաթերթը գրում է.
Ներքին գործերի նախարարությունն առաջարկում է Երևան քաղաքի վարչության և ձերբակալվածներին պահելու վայրերում գործարկել խոշտանգման կամ վատ վերաբերմունքի այլ ձևերի հետ կապված բժշկական արձանագրման պիլոտավորման ծրագիրը։ Ներկայում ձերբակալված անձանց բժշկական զննությունն իրականացվում է շտապ օգնության ծառայության բժիշկների կողմից, և, հաշվի առնելով, որ այս պրակտիկան Խոշտանգումների կանխարգելման կոմիտեի կողմից գնահատվել է որպես դրական, առաջարկվում է նախատեսել, որ պիլոտավորման ծրագրի շրջանակներում ձերբակալվածներին պահելու վայրեր հրավիրված շտապ բժշկական օգնության ծառայության բուժաշխատողները պետք է ձերբակալված անձի բժշկական զննության արդյունքում նախագծով սահմանված ձևաթղթի և ուղեցույցի հիման վրա կազմեն խոշտանգման կամ վատ վերաբերմունքի այլ ձևերի հետ կապված բժշկական զննության արձանագրություն։Առաջնորդվելով Ստամբուլ յան արձանագրության դրույթներով, ինչպես նաև հիմք ընդունելով ՀՀ քրեակատարողական օրենսգրքի կարգավորումները՝ նախագծով նաև առաջարկվում է սահմանել խոշտանգման կամ վատ վերաբերմունքի այլ ձևերի հետ կապված բժշկական զննության արձանագրման մանրամասները։ Առաջարկվում է սահմանել, որ նման արձանագրություն կազմվում է, եթե առկա է ձերբակալված անձի գրավոր կամ բանավոր հայտարարությունը՝ մարմնական վնասվածքը կամ առողջական վիճակի վերաբերյալ գանգատը խոշտանգման կամ վատ վերաբերմունքի այլ դրսևորման հետևանք լինելու վերաբերյալ: Արձանագրություն նաև կազմվում է, եթե բուժաշխատողը հայտնաբերում է, որ ձերբակալված անձի մարմնական վնասվածքը կամ առողջական վիճակի վերաբերյալ գանգատը կարող է լինել խոշտանգման կամ վատ վերաբերմունքի այլ ձևերի հետևանք, կամ եթե ձերբակալվածների պահման վայրի վարչակազմի ծառայողը բուժաշխատողին հայտնում է խոշտանգման կամ վատ վերաբերմունքի այլ ձևերի ենթադրյալ դեպքի մասին։Նախագծի ընդունման արդյունքում կապահովվի Հայաստանում ձերբակալված անձանց պատշաճ բժշկական զննության ու դրա արդյունքների ամբողջական արձանագրման մեխանիզմների փորձարկումը՝ միասնական չափանիշների հիման վրա:
