Հունգարիան չի աջակցի Ռուսաստանի դեմ ԵՄ նոր պատժամիջոցներին՝ էներգակիրների մատակարարման ոլորտում։ Այս մասին հայտարարել է Հունգարիայի արտաքին գործերի և արտաքին տնտեսական կապերի նախարար Պետեր Սիյարտոն ԵՄ երկրների գործընկերների հետ Լյուքսեմբուրգում հանդիպումից հետո։
Նա նշել է, որ հանդիպմանը քննարկվել է Ռուսաստանի դեմ պատժամիջոցների մեծ փաթեթի 17-րդ նախագիծը, և որ Ուկրաինայի արտգործնախարար Անդրեյ Սիբիգան, որը քննարկումներին մասնակցել է տեսահոլովակի միջոցով, «պահանջել է պատժամիջոցներ սահմանել ռուսական էներգառեսուրսների մատակարարման և միջուկային արդյունաբերության դեմ»։
«Եվրամիությունից մի քանի գործընկերներ միացել են այդ պահանջներին: Մենք հասկացրել ենք, որ ոչ մի կերպ չենք աջակցելու դրան», - ասել է Սիյարտոն հունգարացի լրագրողներին տված հարցազրույցում, որը հեռարձակվում է M1 հեռուստաալիքով:
