Թուրքիան աջակցում է Ռուսաստանի և ԱՄՆ-ի միջև երկխոսությանը, ուկրաինական հակամարտության շուտափույթ դադարեցման կողմնակից է և աջակցում է Դոնալդ Թրամփի ջանքերին այս ուղղությամբ, RIA Novosti-ին ասել է ՆԱՏՕ-ի Խորհրդարանական վեհաժողովում թուրքական պատվիրակության ղեկավար Մևլութ Չավուշօղլուն։
«Թուրքիան աջակցում է երկու տերությունների միջև երկխոսությանը, որի նպատակն է դադարեցնել պատերազմը և տարածաշրջանում խաղաղություն և կայունություն հաստատել: Մենք կողմ ենք հակամարտությունը որքան հնարավոր է շուտ ավարտելուն, դա ձեռնտու կլինի ողջ աշխարհին, ոչ միայն երկու երկրներին», - Անթալիայի դիվանագիտական ֆորումի շրջանակներում ասել է նախկին արտգործնախարար Չավուշօղլուն:
Նրա խոսքով՝ Անկարան աջակցում է Թրամփի՝ Ուկրաինայում հակամարտությունը դադարեցնելու ջանքերին, և ժամանակին հանդես է եկել նաև որպես միջնորդ։
«Բանակցելու համար պետք է շփվել բոլոր կողմերի հետ և գտնել բոլորին ձեռնտու պայմաններ։
Մենք՝ որպես Թուրքիա, երբեմն հանդես ենք գալիս որպես միջնորդ, երբեմն հեշտացնում ենք կողմերի համար բանակցությունները, երբեմն հյուրընկալում նրանց մեր տարածքում»,- ասել է Չավուշօղլուն։
