Չինաստանը ԱՄՆ-ին կոչ է անում հարգել փոխադարձ շահերը և լուծել առևտրատնտեսական տարաձայնությունները երկխոսության և խորհրդակցությունների միջոցով։ Այս մասին ասվում է Չինաստանի Ժողովրդական Հանրապետության Պետական խորհրդի մամուլի գրասենյակի հրապարակած փաստաթղթում («Սպիտակ թուղթ») Վաշինգտոնի հետ երկկողմ առեւտրատնտեսական հարաբերությունների հետ կապված հարցերի վերաբերյալ։
«Խնդրի լուծման բանալին միմյանց հիմնական շահերն ու մտահոգությունները հարգելն է, երկխոսության և խորհրդակցությունների միջոցով ճիշտ լուծում գտնելը»,- ասվում է փաստաթղթում։
Չինաստանի Պետխորհրդի մամուլի գրասենյակը նաև նշել է, որ «Չինաստանի և Միացյալ Նահանգների համար, որպես տարբեր տնտեսական համակարգեր ունեցող երկրներ, նորմալ է առևտրատնտեսական համագործակցության մեջ տարբերություններ ունենալը»:
Միաժամանակ, փաստաթղթում հույս է հայտնվում, որ Պեկինը և Վաշինգտոնը «կշարժվեն միմյանց ուղղությամբ, կհետևեն փոխադարձ հարգանքի, խաղաղ գոյակցության և շահեկան համագործակցության սկզբունքներին»։
Ապրիլի 2-ին ԱՄՆ նախագահ Դոնալդ Թրամփը հայտարարեց 185 երկրների և տարածքների ապրանքների համար մաքսատուրքեր սահմանելու մասին։ Ապրիլի 5-ից ուժի մեջ են մտել 10% համընդհանուր սակագները, իսկ ապրիլի 9-ից սկսել են գործել անհատական սակագները։
