Էստոնիայի նախագահ Ալար Կարիսը հաստատել է սահմանադրության փոփոխությունների օրենքը, ըստ որի օտարերկրյա քաղաքացիները կզրկվեն ընտրություններում ընտրելու իրավունքից, հայտնում է ERR-ը՝ վկայակոչելով պետության ղեկավարի հայտարարությունը։
Ավելի վաղ Postimees-ը հայտնել էր, որ Էստոնիայի խորհրդարանն ընդունել է սահմանադրության փոփոխություն, որը երրորդ երկրների, այդ թվում՝ Ռուսաստանի և Բելառուսի քաղաքացիներին զրկելու է մունիցիպալ ընտրություններում քվեարկելու իրավունքից։
Նշվում է, որ փոփոխություններին կողմ է քվեարկել 93 պատգամավոր, դեմ են եղել յոթ խորհրդարանականներ, բոլորն էլ կենտրոնամետ խմբակցության անդամներ։
«Որոշումը, որ միայն Էստոնիայի և Եվրամիության քաղաքացիները կկարողանան քվեարկել ՏԻՄ ընտրություններում, անկասկած օրինական է: Նույնքան կարևոր է, որ նրանք, ովքեր մնացել են առանց ընտրելու իրավունքի, չմտածեն, որ պետությունը ցանկանում է իրենց հեռացնել հասարակական կյանքից կամ դիտում է որպես անվտանգության սպառնալիք»,- ասել է Կարիսը:
