Հունգարիայի դիրքորոշումը ԵՄ-ի հաջորդ քվեարկության ժամանակ Ռուսաստանի դեմ պատժամիջոցների երկարաձգման վերաբերյալ կախված կլինի աշխարհաքաղաքական իրավիճակից։ Այս մասին հայտարարել է Հունգարիայի արտաքին գործերի և արտաքին տնտեսական կապերի նախարար Պետեր Սիյարտոն՝ հույս հայտնելով, որ Ռուսաստանի և ԱՄՆ-ի միջև ուկրաինական հարցի շուրջ բանակցությունները կհաջողվեն։
«Մեր որոշումը մեծապես կախված կլինի աշխարհաքաղաքական հանգամանքներից»,- ասել է ԱԳՆ ղեկավարը՝ Bloomberg-ին տված հարցազրույցում պատասխանելով այն հարցին, թե արդյոք Հունգարիան հետագայում կաջակցի Ռուսաստանի դեմ ԵՄ պատժամիջոցների երկարաձգմանը։
Հարցին, թե Ռուսաստանը խաղաղություն է փնտրում Ուկրաինայի հետ, նախարարն ասել է.
«Ես իսկապես հուսով եմ, որ հակամարտության երկու կողմերն էլ խաղաղություն են ցանկանում։ Ես նաև գիտեմ, որ նախագահ Թրամփն ու նրա թիմը հավատարիմ են խաղաղությանը: Սա շատ կարևոր է»,- նշել է նա՝ հիշեցնելով, որ դա հաստատել է Բրյուսելում ՆԱՏՕ-ի արտգործնախարարների վերջերս կայացած հանդիպման ժամանակ ԱՄՆ պետքարտուղար Մարկո Ռուբիոն։
