Ստամբուլի գլխավոր դատախազությունը քաղաքում չարտոնված բողոքի ակցիաներին մասնակցելու գործով մեղադրական եզրակացություն է պատրաստել։ A haber հեռուստաալիքի փոխանցմամբ՝ մեղադրող կողմը 139 մեղադրյալի համար պահանջում է մինչև երեք տարվա ազատազրկում։
Դատարան ներկայացված մեղադրական եզրակացության մեջ ասվում է, որ մարտի 19-23-ը Ստամբուլում արգելվել է ցանկացած զանգվածային ցույց: Չնայած դրան և ոստիկանների կողմից ցրվելու պահանջով ծանուցումներին, «ամբոխը համառորեն հրաժարվել է ցրվելուց և սկսել է անկարգություններ՝ հարձակվելով շրջափակում գտնվող ոստիկանների վրա»:
Գործի նյութերում նշվում է, որ «չնայած իրավապահ մարմինների բազմիցս զգուշացումներին, ցուցարարները դիմադրություն են ցույց տվել, նրանց նկատմամբ կիրառվել են համաչափ միջոցներ, իսկ կասկածյալները բերման են ենթարկվել»։
Գործի նյութերը պարունակում են նաև տեսագրություններ և հաղորդումներ՝ ցուցարարներից մի քանիսի կողմից անօրինական գործողությունների վերաբերյալ ապացույցներով։
