Բրազիլիան ապրիլի 10-ից կվերացնի ԱՄՆ քաղաքացիների համար առանց վիզայի ռեժիմը, հայտարարել է Բրազիլիայում ԱՄՆ դեսպանատունը։
«2025 թվականի ապրիլի 10-ից Բրազիլիայի կառավարությունը կվերականգնի մուտքի արտոնագրի պահանջները Բրազիլիա մեկնող ԱՄՆ բոլոր քաղաքացիների համար»,- ասվում է դեսպանատան պաշտոնական կայքում։
Ինչպես պարզաբանել է բրազիլական G1 լրատվական պորտալը, որոշումը կազդի նաև Ավստրալիայի և Կանադայի քաղաքացիների վրա։ Պորտալի տվյալներով՝ ԱՄՆ-ի, Ավստրալիայի և Կանադայի քաղաքացիների համար առանց վիզայի ռեժիմ է մտցվել նախկին նախագահ Ժաիր Բոլսոնարոյի հրամանագրով 2019 թվականին, սակայն 2023 թվականին Բրազիլիայի ներկայիս նախագահ Լուիս Ինասիո Լուլա դա Սիլվան օրենք է ընդունել, որը չեղյալ է համարել Բոլսոնարոյի որոշումը։ Օրենքի ուժի մեջ մտնելը երեք անգամ հետաձգվել է, գրում է պորտալը։
Բրազիլիայի կառավարությունը նախագահի որոշումը բացատրում է դիվանագիտական փոխադարձության տրամաբանությամբ. այն երկրների զբոսաշրջիկները, որտեղ բրազիլացիներին մուտքի վիզա է անհրաժեշտ, պետք է նաև պահպանեն վիզային ռեժիմը Բրազիլիա մտնելիս, հայտնում է G1-ը։
