Իրանի արտաքին գործերի նախարար Աբբաս Արաղչին հաստատել է, որ ինքը և ԱՄՆ նախագահ Դոնալդ Թրամփի հատուկ բանագնաց Սթիվեն Ուիթքոֆը կծառայեն որպես հիմնական բանակցողներ շաբաթ օրը՝ ապրիլի 12-ին Օմանում կայանալիք հանդիպմանը։ Արաղչին համապատասխան հայտարարություն է արել Tasnim գործակալությանը։
Իրանական NourNews գործակալության փոխանցմամբ՝ բանակցություններին կմասնակցի նաեւ Օմանի արտաքին գործերի նախարար Բադր բեն Համադ բեն Համուդ ալ Բուսաիդին։
Ապրիլի 7-ին Թրամփը հայտարարել էր, որ Վաշինգտոնն ու Թեհրանն արդեն ուղիղ խորհրդակցություններ են վարում Իրանի միջուկային ծրագրի շուրջ և կշարունակեն շաբաթ օրը «գրեթե ամենաբարձր մակարդակով»: Նա նշել է, որ ԱՄՆ-ը կգերադասի բանակցությունների միջոցով լուծել Իսլամական Հանրապետության միջուկային զարգացումների հարցը։
Արաղչին հաստատել է ԱՄՆ նախագահի խոսքերը՝ նշելով, որ Վաշինգտոնի հետ բանակցությունների մեջ մտնելը Թեհրանի համար ոչ միայն հնարավորություն է, այլ նաև փորձություն, և դրանք կանցկացվեն միջնորդների հետ։
