Գերմանիայում խորհրդարանական ընտրություններում հաղթած Քրիստոնեա-դեմոկրատական և Քրիստոնեա-սոցիալական միության (CDU/CSU) դաշինքի առաջնորդը և հանրապետության հավանական ապագա կանցլեր Ֆրիդրիխ Մերցը Reuters-ին տված մեկնաբանությունում ասել է, որ օրակարգում է երկրի միջազգային ֆինանսական մրցունակության արագ վերականգնման խնդիրը, և այն պետք է դառնա կոալիցիոն բանակցությունների կենտրոն։
«Իրավիճակը ֆոնդային և պարտատոմսերի միջազգային շուկաներում լարված է և հետագա վատթարացման վտանգի տակ: Հետևաբար, Գերմանիայի համար այժմ, առավել քան երբևէ, հրատապ է հնարավորինս արագ վերականգնել իր միջազգային մրցունակությունը: Այս հարցը պետք է լինի կոալիցիոն բանակցությունների կենտրոնում»,-ասել է Մերցը:
Փետրվարյան Բունդեսթագի ընտրություններից հետո CDU/CSU-ն և կանցլեր Օլաֆ Շոլցի սոցիալ-դեմոկրատները (SPD) սկսել են բանակցություններ վարել կառավարական կոալիցիա ստեղծելու համար։
Ամբողջ աշխարհում նկատվում է ռիսկային ակտիվների լայնածավալ վաճառք՝ գլոբալ տնտեսության և առևտրի համար մտավախությունների պատճառով այն բանից հետո, երբ ԱՄՆ նախագահ Դոնալդ Թրամփը այս շաբաթ ստորագրեց գործադիր հրաման՝ սահմանելով «փոխադարձ» նոր և բարձր մաքսատուրքեր մի շարք այլ երկրներից ներմուծման համար:
