Իրանական կողմը ցանկացած արտաքին սպառնալիքի կպատասխանի Իսլամական Հանրապետության բոլոր զինված ուժերի կոշտ և անհապաղ պատասխանով, երկուշաբթի օրը մամուլի ասուլիսի ժամանակ ասել է Իրանի արտգործնախարարության խոսնակ Էսմայիլ Բաղային։
Ավելի վաղ ԱՄՆ նախագահ Դոնալդ Թրամփը NBC News-ին տված հարցազրույցում սպառնացել էր «աննախադեպ ռմբակոծություններով», եթե ԱՄՆ-ն ու Իրանը համաձայնության չգան։
«Մենք պատրաստ ենք ցանկացած հնարավորության, և վերջին հինգ տասնամյակների ընթացքում Իրանի Իսլամական Հանրապետությունը և Իրանի ժողովուրդը բավականաչափ քայլեր են ձեռնարկել՝ ամրապնդելու իրենց պաշտպանունակությունը, որպեսզի կարողանան լիարժեք վստահությամբ և կամքով դիմակայել ցանկացած ագրեսիայի։
Եթե սպառնալիքներն իրագործվեն, դրանք անպայման կարժանանան արագ, անհապաղ և կոշտ արձագանքի Իրանի բոլոր զինված ուժերի կողմից»,- ասել է Բաղային, որը մեջբերում է իրանական SNN պետական լրատվական գործակալությունը:
Դեռևս փետրվարին ԱՄՆ նախագահ Դոնալդ Թրամփը հայտարարել էր, որ պատրաստ է գործարք կնքել Իրանի հետ՝ նրա դեմ ռազմական գործողություններ սկսելու փոխարեն։
