ԱՄՆ նախագահ Դոնալդ Թրամփի հայտարարած մաքսատուրքերը համեմատաբար ձեռնտու են Թուրքիային, և Անկարայի ղեկավարությունը շարունակում է վերահսկել իրավիճակը, ասել է հանրապետության փոխնախագահ Ջևդեթ Յըլմազը։
Շաբաթ օրը Türkiye թերթը, հղում անելով փորձագիտական կարծիքներին, հաղորդել է, որ չինացի արտադրողները կարող են իրենց մատակարարումների մի մասը ուղարկել դեպի թուրքական շուկա՝ ԱՄՆ-ի կողմից ռեկորդային մաքսատուրքերի սահմանումից հետո։ Կարճաժամկետ հեռանկարում դա, ամենայն հավանականությամբ, կհանգեցնի Թուրքիայում գների անկման, սակայն թուրք արտադրողները կարող են տուժել դրանից, պարզաբանել է հրատարակությունը։
«Նրանք հայտարարեցին Թուրքիայի վրա 10 տոկոս հարկ սահմանելու մասին: Առայժմ դա մեզ ձեռնտու էր: Մաքսատուրքերի բարձրացումը ստիպում է այն երկրներին, որոնք վաճառում են ԱՄՆ-ի շուկա, ագրեսիվ կերպով մուտք գործել այլ շուկաներ, և մենք պետք է զգույշ լինենք:
Մյուս կողմից՝ ապրանքների գները նվազել են, ուստի, այս առումով կարելի է խոսել դրական էֆեկտի մասին։ Պետք է հետևել դրական և բացասական կողմերին։
Թրամփի հայտարարած մաքսատուրքերը համեմատաբար ձեռնտու են Թուրքիային։ Պարզ է, որ մենք գնում ենք դեպի պրոտեկցիոնիստական աշխարհ։ Մենք գնում ենք դեպի մի ժամանակաշրջան, երբ յուրաքանչյուր երկիր կպաշտպանի իր շահերը»,- Յըլմազի խոսքը մեջբերում է CNN Türk-ը։
