Աշխարհի 500 ամենահարուստ մարդկանց ընդհանուր կարողությունը նվազել է 208 միլիարդ դոլարով այն բանից հետո, երբ ԱՄՆ նախագահ Դոնալդ Թրամփի մաքսատուրքերը հանգեցրել են համաշխարհային շուկաների անկմանը: Այս մասին հայտնում է Bloomberg-ը։
Ըստ Bloomberg Billionaires Index-ի (BBI)՝ դա չորրորդ ամենամեծ մեկօրյա անկումն էր ինդեքսի 13-ամյա պատմության մեջ և ամենամեծը՝ COVID-19 համաճարակից ի վեր։ Նշվում է, որ ցուցակում հայտնված միլիարդատերերի կեսից ավելիի կարողությունը նվազել է միջինը 3,3%-ով։
Ըստ հաշվարկների՝ ամենաշատը տուժել են ամերիկացի միլիարդատերերը, մասնավորապես՝ Meta կորպորացիայի ղեկավար Մարկ Ցուկերբերգը և Amazon-ի հիմնադիր Ջեֆ Բեզոսը։ Մեքսիկայի ամենահարուստ մարդը՝ Կառլոս Սլիմը, Միացյալ Նահանգներից դուրս գտնվող մի քանի միլիարդատերերի թվում էր, ովքեր խուսափեցին մաքսատուրքերի բացասական ազդեցությունից, նշում է գործակալությունը։
Ցուկերբերգը կրել է ամենամեծ կորուստները՝ Meta-ի բաժնետոմսերի 9%-ով անկումը կրճատել է նրա կարողությունը 17,9 մլրդ դոլարով, ասվում է հրատարակության մեջ։ Amazon-ի բաժնետոմսերը նույնպես նվազել են 9%-ով՝ Ջեֆ Բեզոսի կարողությունը կրճատելով 15,9 մլրդ դոլարով։ Tesla-ի գործադիր տնօրեն Իլոն Մասկը կորցրել է 11 մլրդ դոլար այն բանից հետո, երբ ընկերության բաժնետոմսերը 5,5%-ով անկում ապրեցին:
Թրամփը ապրիլի 2-ին հայտարարեց 185 երկրների և տարածքների ապրանքների համար մաքսատուրքեր սահմանելու մասին։
