Իրանի Մեջլիսի Ազգային անվտանգության և արտաքին քաղաքականության հանձնաժողովի նախագահ Էբրահիմ Ազիզին, ի պատասխան ԱՄՆ սպառնալիքների, խոստացել է, որ իրանցիները կկտրեն Իսլամական հանրապետության տարածք ներխուժած յուրաքանչյուրի ոտքը։
«Եթե որևէ ագրեսոր ոտք դնի Իսլամական Իրանի սրբազան տարածքը, մենք կկտրենք այդ ոտքը: Իսլամական հեղափոխության ուսմունքի համաձայն, մենք չենք նախաձեռնել պատերազմներից որևէ մեկը, բայց մենք սովորել ենք վճռականորեն և ամուր դիմակայել ագրեսորներին», - ընդգծել է նա IRNA-ին տված հարցազրույցում:
«Սիոնիստական ռեժիմը և ԱՄՆ-ը պետք է իմանան, որ եթե մտացածին պատրվակով փորձեն թեկուզ չնչին վնաս հասցնել մեր ազգային անվտանգությանը, ապա աշխարհում ոչ մի տեղ իրենց ապահով չեն զգա»,- հավելել է իրանցի պատգամավորը։
Ազիզիի խոսքով՝ ցանկացած պետություն, որը համագործակցում է ԱՄՆ-ի կամ Իսրայելի հետ, Իրանի կողմից կհամարվի թիրախ մարտի դաշտում։
