Գրիգոր Բալասանյանն առաջին հերթին մատնանշում է այն փաստը, որ խաղաղության համաձայնագրի տեքստը մինչ օրս չի հրապարակվել, և մարդիկ չգիտեն՝ ինչ բովանդակությամբ փաստաթուղթ է Երևանը պատրաստվում ստորագրել Բաքվի հետ և արդյոք այն բխում է Հայաստանի ազգային շահերից:
«Ես չեմ բացառում, որ կան նաև պայմանագրին կից գաղտնի արձանագրություններ, որովհետև Ալիևի ախորժակը հաշվի առնելով՝ ես չեմ հավատում, որ նա մեկ վայրկյանում դարձավ խաղաղասեր: Ավելին, ես կարծում եմ, որ սա ծուղակ է հայկական կողմի համար: Ալիևի ձեռագիրը շատ լավ իմանալով՝ կարող ենք կանխատեսել, որ աշխատելու են հետևյալ տրամաբանությամբ. ինչ-որ մի բան հետո կստորագրվի ինչ-որ մի հարթակում, դա կլինի, օրինակ, Մոսկվան, Ալիևը կսպասի՝ մինչև Հայաստանն իր ստանձնած պարտավորություններն ամբողջությամբ կկատարի, հետո կսկսի մեղադրել հայկական կողմին իր դիրքերը ռմբակոծելու, դիրքերի ուղղությամբ կրակոցներ արձակելու, ստանձնած պարտավորությունները ոչ արագ կատարելու մեջ և մի օր էլ կհայտարարի պայմանագրից դուրս գալու մասին, բայց դա կհայտարարի՝ ցույց տալով, որ Հայաստանն էր մեղավոր, որ ինքը դուրս եկավ պայմանագրից: Իսկ պայմանագրի ստորագրումը, կարծում եմ, կլինի այն ժամանակ, երբ այն հավանության արժանանա տարածաշրջանային տերությունների՝ Իրանի և Ռուսաստանի կողմից», - մասնավորապես նշեց միջազգայնագետը:
Հիշեցնենք, որ մարտի 13-ին ՀՀ արտաքին գործերի նախարարությունը տեղեկացրեց Հայաստանի և Ադրբեջանի միջև խաղաղության համաձայնագրի նախագծի շուրջ բանակցությունների ավարտի մասին՝ նշելով, որ խաղաղության համաձայնագիրը պատրաստ է ստորագրման: Ըստ ԱԳՆ հայտարարության՝ Հայաստանն ընդունում է «Հայաստանի Հանրապետության և Ադրբեջանի Հանրապետության միջև խաղաղության և միջպետական հարաբերությունների հաստատման մասին համաձայնագրի» նախագծի չհամաձայնեցված երկու հոդվածների վերաբերյալ Ադրբեջանի առաջարկությունները և առաջարկել է հանդես գալ համատեղ հայտարարությամբ: Սակայն Բաքուն նախընտրեց հանդես գալ միակողմանի հայտարարությամբ: Ադրբեջանի այդ առաջարկությունները վերաբերում էին Բաքվի առաջադրած հերթական երկու նախապայմանին՝ միջազգային ատյաններում փոխադարձ հայցերը հետ կանչելուն և սահմանին երրորդ ուժերի տեղակայումից հրաժարմանը: Ադրբեջանի արտգործնախարար Ջեյհուն Բայրամովը իր հերթին հայտարարեց, որ հաջորդ փուլում Հայաստանը պետք է փոխի իր Սահմանադրությունը և մայր օրենքից հեռացնի իբրև թե Ադրբեջանի նկատմամբ ունեցած տարածքային պահանջները, ինչպես նաև՝ պետք է լուծարվի ԵԱՀԿ Մինսկի խումբը: Վարչապետ Նիկոլ Փաշինյանը մարտի 19-ին և 20-ին հայտարարել է, որ ինքը պատրաստ է իր ստորագրությունը դնել համաձայնեցված փաստաթղթի տակ՝ իր ֆեյսբուքյան էջում նշելով, որ Ադրբեջանի նախագահ Իլհամ Ալիևին առաջարկում է սկսել խորհրդակցություններ Հայաստանի և Ադրբեջանի միջև խաղաղության համաձայնագրի համաձայնեցված նախագծի ստորագրման շուրջ:
Մանրամասները՝ տեսանյութում:
Հեղինակ՝ Արամ Սարգսյան
Օպերատոր՝ Սուրեն Դավթյան
Մոնտաժը՝ Արարատ Գրիգորյանի
