Թեեւ 70 միլիարդը շատ մեծ բեռ է մեր պետական բյուջեի համար, բայց համընդհանուր հայտարարագրման այս համակարգով մենք մի քանի խնդիր ենք լուծելու: Այս մասին կառավարության նիստում հայտարարեց վարչապետ Նիկոլ Փաշինյանը:
«Թվայնացման ոլորտում մենք շատ ուժեղ մոտիվացիաներ չունենք, իսկ սա մեզ շատ մեծ խթան է տալու, որովհետև մենք պարտադրված ենք լինելու թվային մեր հարթակները ուժեղացնել։ Այնպես չի, որ մենք հիմա չենք ուզում, բայց միշտ այդ լրացուցիչ խթանը, ժամկետով սահմանափակած լինելու զգացողությունը աշխատանքը ավելի կոնկրետ է դարձնում։
Երկրորդը, մենք համընդհանուր հայտարարագրման համակարգով պետություն- քաղաքացի հարաբերությունների նոր ենթակառուցվածք ենք ստեղծում, որը միանշանակ ուժեղացնում է և պետությանը, և քաղաքացուն։ Եվ երրորդը, մենք կրթական բոլորովին նոր ենթակառուցվածք ենք ունենալու:
Ընկերությունների կամ ձեռնարկությունների միջև առողջ մրցակցություն է ձևավորվելու և դրանից շահելու է թե կառավարությունը, պետությունը, թե շահառուները»,- ընդգծեց Փաշինյանը:
Նա հայտարարեց՝ համընդհանուր հայտարարագրման համակարգի ներդրման այս պրոցեսից իր ոգևորությունը չի նվազում. «Որովհետև ինչքան գնում է, ես հասկանում եմ, որ նորանոր շերտեր են բացվում, որոնք ցույց են տալիս, որ իրոք շրջադարձային նշանակություն ունեցող բարեփոխում ենք անում: Ես ուրախ եմ, որ ակնհայտորեն առաջին հակադարձումից հետո հանրային ընկալումը պրոցեսի նկատմամբ, գնալով օր-օրի այդ ավելի տեսանելի է: Դա շատ ուրախացնող փաստ է«- հայտարարեց վարչապետը:
