Հայաստանն աշխատում է, և դուք դա հրապարակային տեսնում եք, որպեսզի առաջ մղի խաղաղության համաձայնագրի ստորագրման գործընթացը։
Այս մասին լրագրողների հետ զրույցում ասաց Անվտանգության խորհրդի քարտուղար Արմեն Գրիգորյանը։
Հարցին, թե խաղաղության պայմանագրով ադրբեջանցիները դուրս կգա՞ն ՀՀ օկուպացված տարածքներից՝ նա նշեց․ «Այդ հարցին բազմաթիվ անգամ անդրադարձել ենք։ Դելիմիտացիայի շրջանակներում այդ հարցը հասցեագրվելու է»։
Նրա պնդմամբ՝ բանակցային գործընթացի վերաբերյալ իրենք հրապարակային կիսվել են հանրության հետ․
«Ես հասկանում եմ, որ հանրային հետաքրքրություն կա պայմանագիր մասին ավելի մանրամասն իմանալու համար, բայց հաշվի առնելով, որ դեռևս օրի ու տեղի մասով համաձայնություն չունենք՝ շարունակում ենք աշխատել, երբ որ լինի, նաև հրապարակային տեքստը կներակայացնենք»,– նշեց ԱԽՔ-ը՝ հավելելով, որ դա ավելի շատ «դիվանագիտական մոտեցում է հարցին»։
Գրիգորյանը նշեց, որ խաղաղության համաձայնագրի ստորագրման համար վայրի հետ կապած դեռ պայմանավորվածություն չկա, բայց ՀՀ–ն պատրաստ է քննարկել և համաձայնեցնել տեղն ադրբեջանական կողմի հետ․
«Եթե խաղաղության պայմանագիրը ստորագրենք, կարծում եմ՝ ինչ–որ բալանսավորված տարբերակով կստորագրենք»,– ասաց Գրիգորյանը։
