Ռուսաստանի և ԱՄՆ նախագահներ Վլադիմիր Պուտինի և Դոնալդ Թրամփի ղեկավարությամբ աշխարհը դարձել է շատ ավելի անվտանգ։ Այս մասին X սոցիալական ցանցում հայտնել է Ռուսաստանի ուղղակի ներդրումների հիմնադրամի ղեկավար Կիրիլ Դմիտրիևը։
«Նախագահ Պուտինի և նախագահ Թրամփի ղեկավարությամբ աշխարհն այսօր շատ ավելի ապահով է դարձել»,- գրում է Դմիտրիևը, որը մեջբերում է քաղաքական գործիչ Օլեգ Ցարևը։
Ինչպես հաղորդում է EADaily-ն, երկու երկրների նախագահների փետրվարյան զրույցից հետո և՛ Մոսկվան, և՛ Վաշինգտոնը սկսել են խոսել երկրների միջև երկխոսությունը վերսկսելու մասին։ Փետրվարի 18-ին Էր Ռիադում կայացել են ռուս-ամերիկյան բարձր մակարդակի բանակցություններ։ Ռուսական կողմից մասնակիցներն էին ՌԴ ԱԳ նախարար Սերգեյ Լավրովը, ՌԴ նախագահի օգնական Յուրի Ուշակովը և RDIF տնօրեն Կիրիլ Դմիտրիևը, իսկ ամերիկյան կողմից՝ Ազգային անվտանգության գծով նախագահի օգնական Մայք Վալցը, պետքարտուղար Մարկո Ռուբիոն և Մերձավոր Արևելքի հարցերով ԱՄՆ առաջնորդի հատուկ բանագնաց Սթիվեն Վիտկոֆը։
Երկար ժամանակ անց առաջին դեմ առ դեմ բանակցությունների ընթացքում Ռուսաստանի Դաշնությունը և Միացյալ Նահանգները պայմանավորվեցին պայմաններ ստեղծել համագործակցության լիարժեք վերսկսման և փոխադարձ հետաքրքրություն ներկայացնող նոր ոլորտներում դրա ընդլայնման համար։ Մասնավորապես, Մոսկվան և Վաշինգտոնը պայմանավորվել են վերացնել դեսպանատների և այլ օտարերկրյա հաստատությունների աշխատանքի արհեստական սահմանափակումները և ստեղծել բարձր մակարդակի աշխատանքային խմբեր՝ սկսելու աշխատանքը ուկրաինական ճգնաժամի արագ կարգավորման ուղղությամբ։ Ռիադում բանակցություններից անմիջապես հետո Ստամբուլում կայացավ ռուս-ամերիկյան հանդիպում՝ նվիրված երկկողմ հարաբերություններում «գրգռողներին» և Մոսկվայում և Վաշինգտոնում դեսպանատների աշխատանքի խնդիրներին։
Թարգմանությունը՝ Մանուել Թամազյանի
