Թեհրանն ու Վաշինգտոնը կապեր են պահպանում և միջնորդների միջոցով արդեն խորհրդակցություններ են անցկացնում Իրանի միջուկային ծրագրի շուրջ։ Այս մասին հայտարարել է Իրանի արտգործնախարար Աբբաս Արաղչին։
«Ինչ վերաբերում է միջուկային հարցերի հնարավոր բանակցություններին, մենք ունենք ծրագիր և լավ մտածված ռազմավարություն, բանակցությունները շարունակվում են միջնորդների միջոցով, ինչպես նաև պահպանում ենք փոխգործակցության ալիքը երեք եվրոպական երկրների հետ (Մեծ Բրիտանիա, Գերմանիա և Ֆրանսիա):
Նա հավելել է, որ Իրանը համագործակցում է Ատոմային էներգիայի միջազգային գործակալության (ՄԱԳԱՏԷ) և նրա գլխավոր տնօրեն Ռաֆայել Գրոսիի հետ։ «Այժմ քննարկվում է նոր նախաձեռնություն՝ առկա խնդիրները լուծելու համար»,- նշել է Արաղչին։
«Եթե մենք բանակցություններ սկսենք ԱՄՆ-ի հետ այնպիսի պայմաններում, երբ մյուս կողմը առավելագույն ճնշման քաղաքականություն է վարում, ապա մենք միտումնավոր թույլ դիրքից կմտնենք դրանց մեջ և ոչ մի արդյունքի չենք հասնի։
Խոսքը համառության կամ իդեալիստական սկզբունքների մասին չէ, այլ մասնագիտական մոտեցման: Պետք է մյուս կողմին ապացուցել, որ ճնշման ռազմավարությունն անարդյունավետ է, և միայն այդ դեպքում հնարավոր կլինի հավասար պայմաններով նստել բանակցությունների սեղանի շուրջ»,- հավելել է Արաղչին։
