ԱՄՆ Ազգային հետախուզության տնօրեն Թուլսի Գաբարդը հաստատել է Ուկրաինայի հետ հետախուզության փոխանակման վերսկսումը։
«Միացյալ Նահանգների նախագահ Դոնալդ Թրամփի ղեկավարության շնորհիվ մենք մեկ էական քայլ ավելի մոտ ենք Ուկրաինայում արյունալի պատերազմի ավարտին։ Նախագահի հրահանգով Ուկրաինայի հետ հետախուզության փոխանակման դադարն ավարտվել է», - գրել է Գաբարդը:
Երեքշաբթի օրը Սաուդյան Արաբիայում կայացել է ԱՄՆ-ի և Ուկրաինայի պատվիրակությունների հանդիպումը։ Զելենսկիի գրասենյակը բանակցություններից հետո հրապարակել է Կիևի և Վաշինգտոնի համատեղ հայտարարություն, որում նշվում է, որ Կիևը պատրաստ է 30 օրով հրադադարի մասին ԱՄՆ առաջարկին, որը կարող է երկարաձգվել կողմերի համաձայնությամբ։
Փաստաթղթում նշվում է նաև, որ ԱՄՆ-ը անմիջապես կչեղարկի հետախուզության փոխանակման դադարը և կվերսկսի ռազմական մատակարարումները Ուկրաինային։
