Ուկրաինայում հրադադարը և Կիևին ամերիկյան օգնության վերսկսումը կլինեն Կանադայում G7-ի արտգործնախարարների առաջիկա հանդիպման հիմնական թեմաները, հայտարարել է Իտալիայի արտգործնախարար և փոխվարչապետ Անտոնիո Տայանին։
«Զինադադարը և Կիևի ամերիկյան ռազմական պաշտպանության վերսկսումը կլինեն առաջին հարցերը, որոնք G7-ի արտգործնախարարները կքննարկեն Կանադայում, այդ թվում՝ ԱՄՆ պետքարտուղար Մարկո Ռուբիոյի հետ»,- ասել է Տայանին, մեջբերում է Nova-ն։
ԱԳՆ ղեկավարը և Իտալիայի փոխվարչապետը նաև ասել է, որ ուկրաինական և ամերիկյան պատվիրակությունների միջև Ջիդայում բանակցությունները կարևոր առաջընթաց են Ուկրաինայի համար խաղաղության ճանապարհին, «որը Եվրոպան ցանկանում է օգնել կառուցել»։
Իտալիայի վարչապետ Ջորջիա Մելոնին, մեկնաբանելով Սաուդյան Արաբիայում կայացած հանդիպման արդյունքները, ասել է, որ Հռոմը «լիովին աջակցում է նախագահ (Դոնալդ-խմբ.) Թրամփի ղեկավարությամբ ԱՄՆ ջանքերին՝ հասնելու արդար խաղաղության, որը կապահովի Ուկրաինայի երկարաժամկետ անվտանգությունը»։
«Այժմ որոշումը Ռուսաստանինն է»,- նշել է վարչապետը Նախարարների խորհրդի ղեկավարության մամուլի ծառայության հրապարակած հաղորդագրության մեջ։
