«Հրապարակ» թերթը գրել է․
Բաքվում ընթացող շինծու դատավարության հերթական նիստի ժամանակ ցուցմունք է տվել Արցախի նախկին նախագահ Արայիկ Հարությունյանը:
Ինչպես պնդում են ադրբեջանական ԶԼՄ-ները, Հարությունյանն, իբր, ասել է, որ ինքը 14 տարեկան է եղել, երբ սկսվել են Ղարաբաղյան իրադարձությունները, և որ ինքն, իբրև թե, չի մասնակցել անօրինական հանրահավաքներին։
Նա նաև նշել է, թե ինքը տեղյակ է՝ ովքեր են շարժման օրերին այնտեղ ելույթ ունեցել. «Գիտեմ, որ հանրահավաքներում ելույթ են ունեցել գրողներ Գուրգեն Գաբրիելյանը, Վարդան Հակոբյանը, Գարաչի Բեգլարյանը։ Ես գիտեմ, որ Գուրգեն Գաբրիելյանը մանկագիր, բանաստեղծ է եղել, այսքանը գիտեմ»։
Ըստ նույն ԶԼՄ-ների, Արցախի նախկին ղեկավարն հայտարարել է, որ լսել է «ապօրինի զինված կազմավորումներից մի քանիսի անունները»:
Իսկ «Արաբո» գումարտակի մասին խոսելիս, իբր, նշել է հետևյալը.
«Ձեր թվարկած ցուցակի մոտ 30 տոկոսը լսել եմ։ Գիտեմ «Արաբոյի», «Արամիի», «Տիգրան Մեծի», «Սասունցի Դավիթի» մասին։ Ես գիտեի, որ նրանք ինչ-որ ռազմական գործողությունների են մասնակցել։ «Արաբոյի» մասին ամենաշատը գիտեմ. Նրա հրամանատարներից մեկի անունը Մանվել էր։ Նրա հետ իմ շփումները սկսվել են 2020 թվականից հետո»։
Ապօրինի կալանքի տակ գտնվող, Արցախի նախկին ԱԳ նախարար Դավիթ Բաբայանին էլ վերագրում են, թե նա, իբր, հայտարարել է, որ «Ղարաբաղի բանակը կազմավորվել է տարբեր զինված խմբավորումներից, սակայն ինքը չի մասնակցել այդ գործընթացներին։ Նրա խոսքով՝ Արայիկ Հարությունյանի հետ ծանոթացել է 1990 թվականին»:
