«Հրապարակ»-ի խմբագիր Արմինե Օհանյանը գրում է.
«Անկեղծորեն սկսել եմ կարեկցել հայ արեւմտամետներին: Նրանց նախկին վերամբարձ տոնից, հաղթողի, պայքարի մարտիկի, դասատուի ինքնավստահ կեցվածքից ոչինչ չի մնացել: Այնպիսի շոկ են ապրում համաշխարհային վերջին իրադարձություններից, որ դժվար է ասել, թե ինչպես ու երբ են այդ սթրեսը հաղթահարելու: Մի կողմից՝ իրենց ֆինանսական ապագայի անորոշությունը, մյուս կողմից՝ Արեւմտյան աշխարհի պառակտվածությունն ու ապագայի անորոշությունը խոր շփոթմունքի մեջ է գցել նրանց: Արեւմուտքի հանդեպ վերաբերմունքն էլ արդեն միանշանակ չէ` Եւրոպան դեռ սիրելի է, բայց ԱՄՆ-ն արդեն` ոչ այնքան: Իսկ կար ժամանակ, որ Միացյալ Նահանգները անվերապահ պաշտամունքի առարկա էր: Հիմա ԱՄՆ-ում այնպիսի իրադարձություններ են կատարվում, որ հայ արեւմտամետները մնացել են երկու քարի արանքում` Թրամփին պաշտպանել չեն կարող, բայց քննադատելն էլ նշանակում է արեւմուտքի, արեւմտյան արժեքների քննադատություն, ինչին իրենք դեռ հոգեպես պատրաստ չեն եւ` ինչպե՞ս քննադատեն, որ չստացվի, թե իրենց ողջ նախորդ կյանքն են կասկածի տակ առնում, այլ կոնկրետ անձի են քննադատում:
Ուկրաինայի պարտությունը նրանց երեւի նույնքան ցավ է պատճառում, որքան բուն Ուկրաինայում ապրողներին: Ստացվեց, որ հայ արեւմտամետ շրջանակները ոչ միայն քաղաքագիտական վերլուծություններ անելու, իրավիճակը հասկանալու եւ կանխատեսելու ունակ չեն, այլեւ իրենք իրենց փակուղի են մղել ու հիմա փաստի առաջ հայտնվել: Եւ չգիտեն` հնարավո՞ր է արդյոք Եվրոպան տարանջատել ԱՄՆ-ից, կարելի՞ է լինել արեւմտամետ, բայց ԱՄՆ վարչակազմին մերժել, ինչպե՞ս վերաբերվել Թրամփ- Պուտին սիրախաղերին, կամ ի՞նչ գնահատական տալ Զելենսկի-Թրամփ շփումներին:
Այսօր էլ թարսի նման` ԱԺ-ն հետաձգեց Եվրաքվեի նախագծի երկրորդ ընթերցումը: Եւ չունեն ամենակարեւոր հարցի պատասխանը` որտեղի՞ց են այսուհետ գրանտներ ստանալու: Չէ որ նրանց շարժիչ ուժը ոչ թե գաղափարներն են եղել, այլ՝ փողը: ՀԳ. Հատուկ Եւրոպա ուղեւորությունից եմ նկար դրել, որ համոզվեք` Եւրոպան սիրում եմ եւ սա ընդդեմ Եւրոպայի չէ, այլ կեղծ եւրոպասերների..»։
