Եվրոպական երկրները քննարկում են Մեծ Բրիտանիայի մասնակցությամբ եվրոպական վերազինման բանկի և պաշտպանության համաեվրոպական ֆինանսավորման հիմնադրամի ստեղծման հարցը։ Այս մասին հայտնում է Financial Times (FT) թերթը՝ հղում անելով եվրոպացի պաշտոնյաներին։
Նրա տեղեկություններով՝ Հարավային Աֆրիկայում հավաքված եվրոպական երկրների ֆինանսների նախարարությունների ղեկավարները քննարկում են Մեծ Բրիտանիայի մասնակցությամբ վերազինման բանկի կամ ընդհանուր հիմնադրամի ստեղծման հարցը։ «Իրադարձությունները զարգանում են արագ տեմպերով»,- թերթը մեջբերում է պաշտոնյաներից մեկի խոսքերը։
Առաջարկներից մեկն էլ վերազինման բանկ ստեղծելն է։ Այն պետք է ստեղծվի Վերակառուցման և զարգացման եվրոպական բանկի օրինակով։ Վերազինման բանկը կարող է վարկեր տրամադրել ռազմական տեխնիկա գնելու, ինչպես նաև պաշտպանական ոլորտում արդյունաբերական նախագծերի համար՝ ինչպես մասնավոր հատվածին, այնպես էլ կառավարություններին։ Պարբերականը նշում է, որ Լեհաստանը, որը ներկայումս նախագահում է ԵՄ-ում, աջակցել է այս առաջարկին։
FT-ն գրում է, որ քննարկվում է նաև Միացյալ Թագավորության և ԵՄ-ի մասնակցությամբ միասնական հիմնադրամի ստեղծումը։
Նման հիմնադրամի սահմանափակ մասշտաբը կարող է թույլ տալ, որ այն ստեղծվի ավելի արագ, քան բանկը, ասում են վերլուծաբանները: Վարչական տեսանկյունից սա ավելի հեշտ է։
Պաշտպանական բյուջեն ավելացնելու Եվրոպայի մղումը տեղի է ունենում այն ժամանակ, երբ կառավարությունները փորձում են նվազեցնել պետական դեֆիցիտն ու պարտքը, նշում է թերթը։
