Իրանի Իսլամական խորհրդատվական խորհրդի (խորհրդարանի) նախագահ Մոհամմադ-Բաղեր Ղալիբաֆն ասել է, որ Թեհրանը լիովին աջակցում է «3+3» հարթակին, որը կնպաստի Հարավային Կովկասում խաղաղությանն ու կայունությանը։
Հինգշաբթի օրը Միլի Մեջլիսի (Ադրբեջանի խորհրդարանի) նախագահ Սահիբա Գաֆարովան հանդիպել է իր իրանցի գործընկեր Մոհամմադ-Բաղեր Ղալիբաֆին, ով այցելում է Բաքու՝ մասնակցելու Ասիական խորհրդարանական վեհաժողովի (ԱՊԱ) 15-րդ լիագումար նիստին։
«Հանդիպմանը քննարկվել է մեր խորհրդարանների միջև հարաբերությունների ընդլայնումը`որպես միջպետական հարաբերությունների և միջազգային խորհրդարանական կազմակերպություններում համագործակցության կարևոր ասպեկտ։ Կողմերը քննարկել են նաև Հարավային Կովկասի տարածաշրջանում այսօր առկա նոր հնարավորություններն ու հեռանկարները։
Այդ կապակցությամբ Ղալիբաֆը հայտնել է Իրանի լիակատար աջակցությունը 3+3 հարթակին և վստահություն, որ այս ձևաչափը կնպաստի տարածաշրջանում խաղաղությանն ու կայունությանը, ինչպես նաև քաղաքական և տնտեսական համագործակցության զարգացմանը։
Նշվել է, որ արտաքին երկրներին տարածաշրջան ներգրավելն անընդունելի է»,- ՌԻԱ Նովոստիին հայտնել են Ադրբեջանի խորհրդարանի մամուլի ծառայությունից։
