Եվրոպան մեծ խնդիրներ ունի պաշտպանական արդյունաբերության հետ կապված և պետք է համախմբվի։ Այս մասին հայտարարել է Բելգիայի պաշտպանության և արտաքին առևտրի նախարար Թեո Ֆրանկենը փետրվարի 18-ի երեկոյան Financial Times-ին (FT) հրապարակված հարցազրույցում։
«Եվրոպան կարիք ունի ավելի ինտեգրված պաշտպանական արդյունաբերության», - մեջբերում է հրատարակությունը բելգիացի նախարարի խոսքերը։ Նա նշել է, որ յուրաքանչյուր եվրոպական երկիր հետապնդում էր իր նախագծերը, որոնց արդյունքում ստացվում էին փոքրածավալ պատվերներ, սպասարկման բարձր ծախսեր և անարդյունավետություն:
Ֆրանկենն ասել է, որ անհրաժեշտություն կա ստեղծել չորս «իրոք մեծ» պաշտպանական ընկերություններ, որոնք կներգրավեն եվրոպական երկրները: Բայց բելգիացի նախարարը նշել է, որ Եվրոպան չունի այնպիսի առաջնորդների, որոնք գիտակցում են գոյություն ունեցող «մեծ խնդիրները» և առաջ են մղելու նման հավակնոտ նախագծեր։
Եվրոպական համատեղ նախագծերը մինչ այժմ ձախողվել են՝ մասամբ յուրաքանչյուր երկրի՝ ընդհանուր արտադրանքի մասնաբաժինը մատակարարելու ցանկության պատճառով: «Անվանեք առնվազն մեկ եվրոպական նախագիծ, համապարփակ նախագիծ, որը հաջող է եղել», - ասել է Ֆրանկենը:
Ինչպես նշում է հրատարակությունը, եվրոպական երկրներում անհանգստությունն առաջացրել է ԱՄՆ պաշտպանության դեպարտամենտի ղեկավար Փիթ Հեգսեթի հայտարարությունը, ով նախազգուշացրել է, որ իր երկրի ռազմական ներկայությունը Եվրոպայում «հավերժ» չի լինի։
