Իսրայելը պետք է աջակցի Ադրբեջանին իր ցանկացած հակամարտությունում, հատկապես Իրանի և նրա դաշնակից Հայաստանի հետ։ Դրա մասին ասված է իսրայելական The Jerusalem Post պարբերականի հակահայկական հոդվածում։
«Ադրբեջանը Իսրայելի անվտանգության կարևորագույն տարր է: Այն Իրանին սահմանակից միակ բարեկամ պետությունն է, ինչն Իսրայելին հնարավորություն է տալիս օգտագործել այն հետախուզական նպատակներով և, հնարավոր է նաև՝ ռազմական գործողությունների համար:
Իսրայելը պետք է աջակցի Զանգեզուրի միջանցքը վերահսկելու Ադրբեջանի պահանջին, քանի որ դա կտրում է Իրանի և Հայաստանի տարածքային կապը և ծառայում է Իսրայելի շահերին։
Իսրայելը պետք է հնարավորինս ուժեղացնի իր հարաբերությունները Ադրբեջանի հետ, քանի որ դրանք առաջնային նշանակություն ունեն, հատկապես մոտ ապագայում, երբ Իրանը կարող է հատել միջուկային ռումբի ստեղծման շեմը։
Ադրբեջանի ռազմավարական դիրքը և Իսրայելի անվտանգության առումով նրա առանձնահատուկ նշանակությունը հրեական պետության համար հրամայական են դարձնում նման դաշնակցին աջակցելու շատ հստակ քաղաքականություն: Եթե Ադրբեջանը Իսրայելի աջակցության կարիքն ունի, ապա այն պետք է տրամադրվի մեծահոգաբար ու վճռականորեն»,-գրում է իսրայելական պարբերականը։
Աղբյուր` news.am
