Քաղաքագետ Հակոբ Բադալյանը տելեգրամյան ալիքում գրում է․
Ինչ ասել Էր Ռիյադում բանակցության մասին:
Խոշոր հաշվով, առայժմ ոչինչ: Դա մեկնարկ է: Էր Ռիյադում թերեւս տեղի է ունեցել իրավիիճակի գույքագրում, հանգամանալից, մանրամասն, եւ առաջիկա ամիսներին թերեւս այդ ամենի շուրջ կծավալվի դետալային քննարկում՝ բաժանման, վերաբաժանման համար:
Վերստին կրկնեմ այն, ինչ ասել եմ ուկրաինական պատերազմից ի վեր: Պատերազմին նախորդել է ռուս-ամերիկյան վեցամսյա բանակցային գործընթաց, բարձրագույն մակարդակից մինչեւ առանձին գերատեսչական պատվիրակություններ: Վեց ամիս չեն բանակցում հենց այնպես, վեց ամիս չեն բանակցում զրոյական արդյունքով, վեց ամիս չեն բանակցում պարզապես ապարդյուն ճակատ-ճակատի տալով:
Վեց ամիս բազմամակարդակ բանակցությանը սահմանվել են կանոնները՝ պատերազմի կանոնները, աստիճանները: Միայն քաղաքականապես կույրը չէր տեսնի, որ ուկրաինական պատերազմի ընդհանուր առանցքը մշտապես եղել է կառավարելի:
Այժմ սկսել է արդյունքը գույքագրելու եւ դադարը կազմակերպելու գործընթացը: Այն շարունակելու է ուղեկցվել պատերազմով, առնվազն որոշակի ժամանակահատված: Ինչ կկարողանա անել Ռուսաստանն այդ ընթացքում, ինչ կկարողանա վերցնել, մինչեւ վերջնական պայմանավորվածություն:
Սա բնականաբար բարդ է ասել, բայց անկասկած է, որ քննարկվել է նաեւ այդպիսի շեշտադրում: Դա «մատնում» է տեղեկությունը, որ ամերիկյան կողմն առաջարկել է մորատորիում էներգետիկ օբյեկտների թիրախավորման հարցում, իսկ ռուսական կողմն ասել, որ քաղաքացիական ենթակառուցվածքներ իրենք չեն թիրախավորում: Այսինքն, սա նշանակում է, որ դարձյալ քննարկվել է պատերազմի վարման պայման՝ սա անում ենք, սա չենք անում: Այսինքն, պետք է ենթադրել, որ ռուսական կողմը դրել է որոշակի պահանջներ, որոնց ամերիկացիները արձագանքել են՝ եթե կարող եք, հասեք դրանց ռազմական ճանապարհով, իսկ քաղաքականով՝ չենք կարող դա ձեզ տալ: Ներեցեք, մի քիչ պարզունակ ներկայացրի, բայց միտքն ավելի հասկանալի դարձնելու համար:
