Հնդկաստանի վարչապետ Նարենդրա Մոդիի այցը Միացյալ Նահանգներ արդյունավետ և առարկայական էր և նրա բանակցությունները Ամերիկայի նախագահ Դոնալդ Թրամփի հետ տևել են մոտ չորս ժամ։ Այս մասին ճեպազրույցում հայտարարել է Հնդկաստանի արտաքին գործերի առաջին փոխնախարար Վիկրամ Միսրին։
«Հնդկաստանի վարչապետն ավարտեց շատ բովանդակալից և արդյունավետ այցը Միացյալ Նահանգներ, որը տեղի ունեցավ Ամերիկայի նախագահի երդմնակալությունից ընդամենը երեք շաբաթ անց, ինչը ցույց է տալիս Հնդկաստան-ԱՄՆ հարաբերությունների առաջնահերթությունը»,-ասել է նա։ Նրա խոսքով՝ Մոդիի և Թրամփի բանակցությունները տևել են գրեթե չորս ժամ՝ ներառյալ նեղ և ընդլայնված ձևաչափերով քննարկումները։
«Քննարկումներն ընդգրկել են հարցերի լայն շրջանակ՝ սկսած ռազմավարական համագործակցությունից և կապերից անվտանգության, պաշտպանության, առևտրատնտեսական փոխգործակցության, տեխնոլոգիաների, էներգետիկ անվտանգության և մարդկանց միջև կապերի ոլորտներում մինչև տարածաշրջանային և գլոբալ հուզող հարցեր»,-ասել է Միսրին: Նա ասել է, որ այցից հետո ընդունվել է համատեղ հայտարարություն, որը շուտով կհրապարակվի։
Հնդկաստանի վարչապետը Թրամփի հրավերով երկու օր Վաշինգտոնում էր։
