«Հրապարակ» թերթը գրել է.
«Գյումրեցի պրոդյուսեր Ռուբեն Մխիթարյանը թեպետ դեկտեմբերի 4-ին «Հրապարակին» տված հարցազրույցում հերքել էր իր թեկնածությունն առաջադրելու մասին լուրերը, սակայն երկու օր առաջ հանդես եկավ տեսաուղերձով եւ ասաց, որ «Իմ հզոր համայնք» կուսակցության ցուցակով առաջադրվելու է Գյումրու քաղաքապետի թեկնածու:
Նա մեր հարցին` «Ձեր անունն էլ է շրջանառվում՝ որպես քաղաքապետի հնարավոր թեկնածուի», բառացիորեն պատասխանել էր. «Հազար բան են խոսում, ախմախ-ախմախ խոսում են: Ես ումի՞ց պետք է նման առաջարկ ստանայի, եթե որոշում կայացնողը ես եմ:
Ոչ մի կուսակցություն ինձ չի կարող ինչ-որ բան առաջարկել, քանի որ Գյումրու քաղաքապետի պաշտոնը եթե ցանկանում ես զբաղեցնել, ապա ինքդ պետք է ցանկանաս:
2018 թվականին էլ էր մի նման տխմարագույն թեզ շրջանառվել, որ ես իմ հայրական տուն եմ վերադարձել, որովհետեւ քաղաքապետ եմ ուզում դառնալ: Նման բան չկա, ես ոչ մի առաջարկ չեմ ստացել, ինձ չի էլ հետաքրքրում այդ հարցը»:
Այսինքն, որպես գյումրեցի՝ Ձեզ չի՞ հետաքրքրում քաղաքի ճակատագիրը՝ հարցրել էինք նրան։ «Եթե Հայաստանի ղեկավարը տիկտոկեր է, ինձ համար մեկ է, թե ով կղեկավարի Գյումրին»,- ասել էր ու հավելել. «Ես պատրանքների մեջ չեմ ապրում:
Գյումրիում արդեն եղել է իշխանազավթում: Ո՛չ հին ընտրությունն է ինձ հետաքրքիր եղել, ո՛չ էլ գալիք ընտրությունը: Մեր երկիրը տիկտոկերներ են ղեկավարում, դրանով ամեն ինչ ասված է: Ես ընտրություններին լուրջ չեմ վերաբերվում»:
Վերջին հայտարարությունից հետո մենք փորձեցինք կրկին զրուցել Ռուբեն Մխիթարյանի հետ, սակայն նա վերջին օրերին չի պատասխանում հեռախոսազանգերին:
Զրուցել ենք «Իմ հզոր համայնք» կուսակցության ղեկավար, Ուրցաձորի նախկին համայնքապետ Ռաֆիկ Անդրեասյանի հետ, որի ցուցակով Մխիթարյանը պատրաստվում է առաջադրվել:
- Պարոն Անդրեասյան, Ռուբեն Մխիթարյանը Գյումրիում «Իմ հզոր համայնք» կուսակցության քաղաքապետի թեկնածուն է: Ինչպե՞ս որոշեցիք նրան առաջադրել որպես քաղաքապետի թեկնածու, թե՞ ինքն է նման ցանկություն հայտնել: - Նա է ցանկություն հայտնել, մենք էլ ոչ մի առարկություն չունենք իր հետ կապված, քանի որ առաջին օրվանից նկատել ենք իր շարժուձեւը: Շատերն ասում են` նախկին է եւ այլն, բայց, իմ կարծիքով, նախկիններ կան, որոնց գործերն անուրանալի են, սակայն կան նաեւ նախկիններ, որոնց արած գործերն աններելի են: Այդ սկզբունքից ելնելով՝ մենք առարկություններ չունենք եւ պաշտպանելու ենք նրա թեկնածությունը` որպես հայ մարդու: Մենք ունենք մի քանի սկզբունք․ մարդը պետք է լինի անկեղծ, անդավաճան, հայրենասեր եւ լավ ընտանիքի ներկայացուցիչ: Մենք տեղ ենք տալիս լավ ընտանիք ունեցող մարդկանց: Մանրամասն շատ հարցեր չենք էլ քննարկել, դիմել են, մենք էլ համաձայնել ենք: Ասեմ, որ եթե համապետական ընտրություններ լինեն, դրան էլ ենք մասնակցելու, թեպետ դեմ ենք ընտրություններին, մինչեւ այդ այս վարչախմբին պետք է հեռացնենք:
- Ռուբեն Մխիթարյանի՞ն են նախկին ասում, թե՞ Ձեզ:
- Ռուբենի մասին հոդվածներ էին գրել, ապուշ-ապուշ բաներ են գրում, իբրեւ նախկին նախագահների հետ չգիտեմ ինչ: Մեր դժբախտությունը դա է, որ մարդուն կարող են ամբախ-զամբախ սեւացնել: Դեռ սրանց գալու շրջանում իմ մասին էլ ինչ ասես ասում էին, բայց դատարանն ինձ արդարացրեց, ու պարզվեց, որ շինծու խոսակցություններ էին դրանք:- Գուցե հենց նախկինների հետ չասոցացվելու համա՞ր է Մխիթարյանը Ձեր կուսակցությունն ընտրել, թեպետ Դուք էլ եք հարում հանրապետականներին:
- Ես անձամբ կուսակցություններին միշտ շատ դեմ եմ եղել: Կուսակցությունները մեր ժողովրդին բաժանող երեւույթներ են: Կուսակցությունները մարդկանց տարանջատում էին, ես կուսակցություն չէի հիմնադրի, եթե օրենքով պարտադրված չլիներ: Մենք միշտ ակտիվ ենք եղել, մեր հասարակության հետ կարողացել ենք լեզու գտնել, այնպես չէ, որ իշխանություններով էլ հիացած ենք եղել, ժողովրդի շահը միշտ էլ մեզ համար առաջնային է եղել: Ես եղել եմ կոմունիստ, այսօր էլ մնում եմ կոմունիստ, պարզապես, օրենքի պահանջից ելնելով, կուսակցություն ենք ստեղծել, որպեսզի գրագետ մարդկանցով համալրենք շարքերը:-
Իսկ ընտրական ցուցակն ո՞վ է կազմել կամ` կազմելու: Ասում են, որ ճանաչված մարդկանց են ընդգրկել ցանկում:- Ռուբենն է կազմել: Բայց ես ասել եմ իմ պայմանները, որ հանկարծ ինչ-որ կեղծարար մարդիկ չներառվեն ցուցակում, որ կեղծարարներ լինեն, լավ չի լինի:
- Ինչպե՞ս եք որոշելու` ով է կեղծարար եւ ով` ազնիվ:- Հանրապետության քաղաքական դաշտը կեղծարարներով է լցված: Մարդիկ փող են աշխատում, քաղաքականությունն իրենց համար դարձրել են խոպան: Մեկն արեւմուտք է գնում, մեկը հյուսիս է գնում, մոռանում են, որ իրենք հայ են, հայ ընտանիքից են դուրս եկել:
- Ռուբեն Մխիթարյանը, ըստ Ձեզ, ունի՞ շանսեր հաղթելու:- Մենք նրա շանսերը գնահատում ենք` հաշվի առնելով հասարակական կարծիքը, նրա ելույթները: Նա ապացուցում է, որ անկեղծ է, իսկ ժողովուրդը սիրում է նրան:
Մենք հիմնականում հենվել ենք հենց ժողովրդի սիրո վրա:- Դեկտեմբերին նա մեզ հետ զրույցում ընտրությունների հնարավոր մասնակցության լուրերը հերքել էր: Ինչպե՞ս ստացվեց, որ փոխեց մտադրությունը:
Անգամ ասում էր, որ ընտրությունների հետ կապված ոչինչ իրեն հետաքրքիր չէ:- Քաղաքականության մեջ կա «երբեք մի ասա երբեք» լոզունգը: Սա այդ դեպքն է:- Վերջին շրջանում «Իմ հզոր համայնք»-ն ի՞նչ աշխատանքներ է տարել, ունե՞ք մարզերում գրասենյակներ:-
Սպիտակում էլ ենք ավագանու թեկնածուներ առաջադրել, Մասիսում էլ դաշինքով ընտրություններին մասնակցեցինք, Քասախում էլ ունենք ավագանու անդամներ: Ահագին մասնակցություն, ակտիվություն ունեցել ենք: Վերջին շրջանում պասիվացանք մի քիչ, որովհետեւ ասպարեզ եկան տարբեր ուժեր: Գիտեք, մեր ժողովուրդը խաբվել է ուղղակի, որ ժողովրդին ասում են ժեխ, ես դա չեմ ընդունում, չի կարելի նման բաներ ասել, թող ոչ մեկը չմոռանա, որ վաղը` ընտրությունների ժամանակ, գնալու է ժողովրդի դուռը: Մեր ժողովրդին ուղղակի վարպետորեն կարողացան խաբել:
Ես ոչ մի անգամ պարտություն չեմ տարել, իմ ժողովուրդն ինձ միշտ գնահատել է, ես միշտ իմ խոստացածից երեք անգամ ավելին արել եմ մարդկանց համար, ոչ մի անգամ մարդկանց կամքին չեմ բռնացել»:
