Գերմանական Helsing պաշտպանական ընկերությունը 2025 թվականին Ուկրաինային կմատակարարի արհեստական ինտելեկտով հագեցած 6 հազար կամիկաձե անօդաչու թռչող սարք։ Այս մասին գրում է Bild թերթը։
Խոսքը HX-2 մոդելի անօդաչու թռչող սարքերի մասին է՝ մինչև 100 կմ թռիչքի հեռահարությամբ։ Անօդաչու թռչող սարքը զարգացնում է մինչև 220 կմ/ժ արագություն և կարող է զինվել տանկերի և շենքերի դեմ զինամթերքով։
Հրատարակությունը պնդում է, որ արհեստական ինտելեկտը թույլ կտա անօդաչու սարքերին խուսափել էլեկտրոնային պատերազմի հետևանքներից և գործել եղանակային վատ պայմաններում։ Անօդաչու սարքն ունակ է նաև ինքնուրույն իրականացնել հարձակման վերջին փուլը՝ առանց օպերատորի մասնակցության։
2024 թվականին Helsing-ն արդեն 4 հազար անօդաչու թռչող սարք է տեղափոխել Կիև։ Նոր մատակարարումը գնահատվում է մի քանի հարյուր միլիոն եվրո և պետք է ֆինանսավորվի Ուկրաինային տրամադրվող 3 միլիարդ եվրոյի օգնության փաթեթից:
