ԱՄՆ նախագահ Դոնալդ Թրամփը լրագրողներին ասել է, որ մտադիր է երկուշաբթի՝ փետրվարի 10-ին, 25 տոկոս մաքսատուրքեր սահմանել ԱՄՆ պողպատի և ալյումինի մատակարարումների համար։ Այս մասին հայտնել է Սպիտակ տան մամուլի ֆոնդը, փոխանցում է ՏԱՍՍ-ը։
«Մենք երկուշաբթի օրը կհայտարարենք պողպատի մաքսատուրքերի մասին»,- ասել է Թրամփը լրագրողներին Լուիզիանա մեկնող իր ինքնաթիռում։«ԱՄՆ մատակարարվող ցանկացած պողպատի և ալյումինի վրա կլինի 25 տոկոս մաքսատուրք»,- պարզաբանել է նա։
Թրամփը նաև ասել է, որ առաջիկա օրերին մտադիր է հայտարարել լրացուցիչ միջոցների ներդրման մասին, որոնք կազդեն շատ երկրների վրա։
«Երեքշաբթի կամ չորեքշաբթի կայանալիք մամուլի ասուլիսում ես, հավանաբար, կհայտարարեմ փոխադարձ սակագների մասին, դա շատ պարզ է՝ եթե նրանք գանձում են մեզնից, ապա մենք էլ նրանցից»,- ասել է ամերիկացի առաջնորդը։
«Եթե մեզանից 130 տոկոս գանձեն, իսկ մենք նրանցից ոչինչ չգանձենք, ապա նման բան այլևս չի կրկնվի»,- ընդգծել է նա։
