Արտաքին քաղաքականության բալանսավորումը շատ լավ բան է, բայց փոքր պետությունների համար, ինչպիսին Հայաստանն է, այն գրեթե անիրականանալի է: Փոքր պետությունները չունեն այն ռեսուրսները, որ խորամանկ խաղ խաղան մեծերի հետ: Փորձված աղվեսն, ինչպես ասում են, երկու ոտքով է թակարդն ընկնում: Այս մասին Euromedia24-ի հետ զրույցում նշեց ԵՊՀ Միջազգային հարաբերությունների ֆակուլտետի Քաղաքական ինստիտուտների և գործընթացների ամբիոնի վարիչ, քաղաքագետ Գարիկ Քեռյանը՝ մասնագիտորեն վերլուծելով Հայաստանի վարչապետ Նիկոլ Փաշինյանի ելույթը Վաշինգտոնում Հայաստանի արտաքին քաղաքականության հավասարակշռման և անկախության մակարդակի բարձրացման մասին:
Քաղաքագետը նկատեց՝ հավասարակշռված կամ դիվերսիֆիկացված արտաքին քաղաքականություն վարելու սկզբունքը, որի մասին խոսում էր Փաշինյանը, նորույթ չէ հայ իրականության մեջ: Այդ սկզբունքով են փորձել առաջնորդվել Հայաստանի նախորդ բոլոր ղեկավարներն ու կառավարությունները: Գարիկ Քեռյանը հիշեցրեց նախկին արտգործնախարար Վարդան Օսկանյանի կողմից շրջանառության մեջ դրված այսպես ասած՝ «կոմպլեմենտար» քաղաքականության հայտնի եզրույթը:
Հիշեցնենք, որ փետրվարի 4-ին Նիկոլ Փաշինյանը Վաշինգտոնում այցելել է Ատլանտյան խորհուրդ վերլուծական կենտրոն, որտեղ հանդես է եկել ելույթով: Փաշինյանը նշել է, որ իր գլխավորած կառավարությունը որդեգրել է բալանսավորված և բալանսավորման արտաքին քաղաքականություն, իսկ դրա առանցքում Հայաստանի Հանրապետության անկախության և ինքնիշխանության մակարդակի բարձրացումն է: Փաշինյանի խոսքով՝ անկախություն նշանակում է՝ քչերից կախվածությունը փոխարինել շատերից կախվածությամբ: Սա է Հայաստանի անկախության մակարդակի բարձրացման իր բանաձևը:
Մարամասները՝ տեսանյութում:
Հեղինակ՝ Արամ Սարգսյան
