ԱՄՆ նախագահ Դոնալդ Թրամփի վարչակազմը ծրագրում է գրավել Վենեսուելայի առաջնորդ Նիկոլաս Մադուրոյի երկրորդ ինքնաթիռը։ Այս մասին հայտնում է Associated Press-ը՝ հղում անելով ամերիկացի պաշտոնյաներին և Պետդեպարտամենտի փաստաթղթին։
Ինչպես նշված է գործակալության կողմից ձեռք բերված փաստաթղթում, խոսքը գնում է Dassault Falcon 200 ինքնաթիռի մասին, որն օգտագործվում է Վենեսուելայի նախագահի և երկրի այլ բարձրաստիճան պաշտոնյաների կողմից արտասահմանյան երկրներ, այդ թվում՝ Հունաստան, Կուբա, Ռուսաստան և Թուրքիա թռիչքների համար, ինչը, ամերիկյան վարչակազմի տեսանկյունից, ԱՄՆ պատժամիջոցների խախտում է։
AP-ի փոխանցմամբ՝ ԱՄՆ պետքարտուղար Մարկո Ռուբիոն մտադիր է հինգշաբթի օրը հայտարարել ինքնաթիռի առգրավման մասին՝ Դոմինիկյան Հանրապետության մայրաքաղաք Սանտո Դոմինգո կատարած այցի ժամանակ, որտեղ ներկայումս գտնվում է Մադուրոյի ինքնաթիռը։
Բռնագրավումն իրականացնելու համար Պետդեպարտամենտի ղեկավարը պետք է ստորագրեր օտարերկրյա օգնությունը սառեցնելու հրամանագրից բացառություն անելու խնդրանքը՝ ինքնաթիռի պահպանման և սպասարկման համար 230 հազար դոլար հատկացնելու համար։ Ինքնաթիռը գրավելու որոշման հաստատումը պահանջում էր նաև ԱՄՆ արդարադատության նախարարության հավանությունը, նշում է գործակալությունը։
Սեպտեմբերի 2-ին ԱՄՆ-ը Դոմինիկյան Հանրապետությունում գրավել է Մադուրոյի ինքնաթիռը և այն տեղափոխել Ֆլորիդա։
ԱՄՆ արդարադատության նախարարության տվյալներով՝ ինքնաթիռը ձեռք է բերվել արտահանման վերահսկողության և ԱՄՆ պատժամիջոցների մասին օրենքների խախտմամբ։
