Միլիարդատեր Իլոն Մասկի կողմից վերահսկվող ԱՄՆ Կառավարության արդյունավետության վարչության (DOGE) թիրախում է հայտնվել ԱՄՆ միջազգային զարգացման գործակալությունը (ԱՄՆ ՄԶԳ, USAID)։ ԱՄՆ ՄԶԳ-ի Վաշինգտոնի կենտրոնակայանի աշխատակիցներին կարգադրել են երկուշաբթի՝ փետրվարի 3-ին, չներկայանալ աշխատանքի, այս մասին հաղորդում է Fox5 պարբերականը՝ վկայակոչելով աշխատակիցներին ուղարկված ծանուցումը։ԱՄՆ ՄԶԳ-ի աշխատակիցները հայտարարել են, որ գիշերվա ընթացքում շուրջ 600 աշխատակից զրկվել է գործակալության համակարգչային համակարգերի հասանելիությունից։
Ավելի վաղ ԱՄՆ ՄԶԳ-ի ավելի քան 50 բարձրաստիճան աշխատակից ուղարկվել էր վարչական արձակուրդի։ Նրանք հրաժարվել էին գաղտնի փաստաթղթեր տրամադրել DOGE-ի աշխատակիցներին։ Ի վերջո, ԱՄՆ Կառավարության արդյունավետության վարչության աշխատակիցներին հաջողվել էր որոշ գաղտնի տեղեկատվության, այդ թվում՝ հետախուզական զեկույցների հասանելիություն ստանալ։Իլոն Մասկը փետրվարի 3-ին ավելի վաղ հայտնել էր, որ խոսել է ԱՄՆ նախագահ Դոնալդ Թրամփի հետ շուրջ վեց տասնամյակ գործող ԱՄՆ ՄԶԳ-ի մասին, և որ նախագահը համաձայնել է, որ այն պետք է փակել։Կոնգրեսի հետազոտական ծառայության տվյալներով՝ 2023 ֆինանսական տարում գործակալությունը տնօրինել է մոտ 40 միլիարդ դոլարի բյուջե:
Ավելի վաղ Թրամփը հայտարարել էր, որ ԱՄՆ ՄԶԳ-ն տնօրինում են «ցնորված արմատականներ»։
