ԱՄՆ կառավարության արդյունավետության վարչությունը (DOGE), որը գլխավորում է միլիարդատեր Իլոն Մասկը, օրական գրեթե 1 միլիարդ դոլար է խնայում դաշնային կառավարության համար, այս մասին վարչությունը հայտնել է Մասկին պատկանող X սոցիալական հարթակում։
«DOGE-ն դաշնային կառավարության համար խնայում է օրական մոտավորապես 1 միլիարդ դոլար՝ հիմնականում ոչ անհրաժեշտ պաշտոններին մարդկանց աշխատանքի վերցնելը դադարեցնելու, DEI-ն (խմբ.` բազմազանության, հավասարության և ներառականության ծրագրերը) ջնջելու և օտարերկրյա կազմակերպություններին ոչ տեղին վճարումները դադարեցնելու շնորհիվ՝ բոլորը համաձայն նախագահի կատարողական հրամանների», - նշված է հայտարարության մեջ։Վարչությունը հավելում է, որ սա լավ սկիզբ է՝ «չնայած այս թիվը պետք է հասնի օրական 3 միլիարդ դոլարի»։
Հունվարի 28-ին ԱՄՆ նախագահ Դոնալդ Թրամփը հրահանգել էր դադարեցնել անչափահասների շրջանում սեռափոխություն իրականացնելու համար դաշնային ֆինանսավորումը և առողջապահական ծախսերին աջակցությունը։ Բացի այդ, Reuters-ի հաղորդմամբ՝ Սպիտակ տունը լրիվ դրույքով աշխատող շուրջ 2 միլիոն դաշնային աշխատողների ֆինանսական արտոնություններ է առաջարկել աշխատանքից հեռանալու համար՝ ԱՄՆ կառավարության աշխատակիցների թիվը կտրուկ կրճատելու նախաձեռնության շրջանակներում։
Հունվարի 20-ին իր երդմնակալությունից հետո Դոնալդ Թրամփը ստորագրել էր հրամանագիր կառավարության արդյունավետության բարձրացման նպատակով երկրում կառույց ստեղծելու մասին՝ իր կողմնակից միլիարդատեր Իլոն Մասկի գլխավորությամբ։
