Իմ դեմ քրեական գործ հարուցել է ԱԱԾ հատուկ կարևորագույն գործերով քննիչ Սպարտակ Պողոսյանը։ Շինծու մեղադրանք կա, որ 2023 թ-ի սեպտեմբերի 22-ին 7-8 հոգով՝ իմ ղեկավարությամբ, մենք պետք է ճեղքեինք 6-7 շարք վահաններով պատսպարված ոստիկանական պատնեշը, բարձրանայինք կառավարության շենք ու, իրենց ձևակերպմամբ, «ֆիզիկապես ոչնչացնեինք» վարչապետին ու բռնազավթեինք իշխանությունը։ Այս մասին «Փաստինֆոյի» տաղավարում պատմեց «Հայոց աշխարհազոր» ռազմաքաղաքական միավորման ղեկավար Ալբերտ Բազեյանը։
«Իրենց ձևակերպմամբ մոտիվացիան հետևյալն է՝ «վարչապետի հետ ունենալով գաղափարական թշնամանք»։ Դատական նիստի ընթացքում ես հարկ եմ համարել այդ քննիչին պարզաբանել, որ չկա «գաղափարական թշնամանք» հասկացողություն, ես և իմ գաղափարակից ընկերները Փաշինյանի հետ ունենք «գաղափարական տարաձայնություն», ինքը ապազգային է, մենք ազգային»։
