Դոնալդ Թրամփը պաշտոնապես ստանձնեց ԱՄՆ նախագահի պաշտոնը՝ վերադառնալով Սպիտակ տուն: Ավետարանի վրա երդում տալուց հետո նորընտիր նախագահը հանդես եկավ ծրագրային ընդարձակ ելույթով՝ ազդարարելով Ամերիկայի «ոսկե դարաշրջանի» սկիզբը: Սա բովանդակային և կոնցեպտուալ ելույթ էր, որում Սպիտակ տան նոր ղեկավարը նախանշեց իր վարչակազմի հիմնական անելիքներն ու քաղաքականությունները գրեթե բոլոր առանցքային ոլորտներում՝ սկսած ներքին հարցերից, մինչև արտաքին աշխարհի հետ հարաբերություններ, Կալիֆոռնիայի հրդեհներից տուժած մարդկանց խնդիրներից՝ մինչև Մարսի նվաճում, Պանամայի ջրանցքի շահագործումից՝ մինչև Չինաստանի հետ մրցակցություն, Մեքսիկական ծոցի վերանվանումից՝ մինչև ուկրաինական պատերազմի դադարեցում: Եվ առաջին կարևոր խնդիրը, որը նա առանձնացրեց, Մեքսիկայի սահմանով անօրինական ներգաղթյալների հոսքը դադարեցնելու հարցն էր:
Իր առաջին քայլերով Թրամփը սկսում է, իր խոսքերով, Ամերիկայի վերականգնումն ու ողջախոհության հեղափոխությունը: Մտնելով օվալաձև աշխատասենյակ՝ Թրամփը նախագահության առաջին իսկ օրը, ինչպես և նախապես հայտարարել էր, ստորագրել է մի շարք հրամանագրեր, այդ թվում՝ չեղարկելով նախորդ նախագահ Ջո Բայդենի վարչակազմի 78 որոշում: Ինչ վերաբերում է միգրանտների հարցին՝ Դոնալդ Թրամփը ստորագրել է հրամանագիր Պենտագոնի ռեսուրսները գործի դնելու, Մեքսիկայի հետ սահմանին զորքեր տեղակայելու և սահմանային պատ կառուցելու մասին: Սպիտակ տան ղեկավարը մտադիր է վերջ տալ անօրինական միգրանտներին բռնելու և բաց թողնելու պրակտիկային և վերականգնել իր «Մնա՛ Մեքսիկայում» քաղաքականությունը:
Մանրամասները՝ տեսանյութում:
Հեղինակ՝ Արամ Սարգսյան
