ԱՄՆ նախագահ Դոնալդ Թրամփը չի բացառում, որ այս տարի կարող է այցելել Չինաստան՝ համապատասխան հրավերի դեպքում, այս մասին նա ասել է իր երդմնակալությունից հետո՝ հունվարի 20-ի երեկոյան, Սպիտակ տան Օվալաձև աշխատասենյակում լրագրողների հետ զրույցում։
Միևնույն ժամանակ ԱՄՆ ղեկավարն ակնարկել է, որ հարցը մեծապես կախված է Պեկինի կողմից Վաշինգտոնին հրավեր ուղարկելուց։ «Դա կարող էր տեղի ունենալ, եթե ես հրավեր ունենայի»,-ասել է Թրամփը՝ պատասխանելով հարցին՝ արդյոք այս տարի կգնա Չինաստան։Հունվարի 19-ին The Wall Street Journal-ը, հղում անելով աղբյուրներին, հայտնել էր, որ Թրամփը դիտարկում է իր պաշտոնավարման առաջին 100 օրվա ընթացքում Չինաստան մեկնելու հնարավորությունը։ Ըստ հրապարակման՝ այցի նպատակը կլինի ամրապնդել հարաբերությունները Չինաստանի նախագահ Սի Ծինփինի հետ։
Բացի այդ, WSJ-ն նշել է, որ դիտարկվում է նաև Հնդկաստան այցելելու տարբերակը։Չինական The Global Times-ը նշում է, որ հունվարի 20-ին Չինաստանի արտաքին գործերի նախարարության խոսնակ Մաո Նին հայտնել է, որ Պեկինը պատրաստ է աշխատել ԱՄՆ նոր վարչակազմի հետ «երկու երկրների նախագահների ռազմավարական ղեկավարությամբ և փոխադարձ հարգանքի, խաղաղ գոյակցության և փոխշահավետ համագործակցության սկզբունքներով»։ Բաժանորդագրվեք մեր ալիքին Telegram-ում
